Read Kaqchikel Sal 112 Bible Online

Sal 112 - Kaqchikel bible

Sal 112

¹Tinimirisex ruq'ij ri Jehová. Jebel ruwa-ruq'ij ri wineq ri k'o rukiy ri Jehová chuwech, ri kan rik'in ri rupixa' rija' nikikot-wi jantape'.

²Ri rijatzul kan xtik'oje' k'a kiq'ij chuwech re ruwach'ulew. Ri kijatzul ri choj kik'aslen, kan xtikik'ul k'a urtisanik.

³Kan xtik'oje' k'a janila chi beyomel rik'in. Ri ruchojmilal jari' ri xtuben jantape'.

⁴Nisaqirisan k'a pe jun q'aq' pa q'equ'm chikiwech ri winaqi' choj kik'aslen, chikiwech ri kan e joyowanel, e koch'onel y kan choj ri kik'aslen.

⁵Ri utzilej wineq k'o joyowanik rik'in y k'o nuya' pa qajik, ri wineq ri' nik'ayin y niloq'on pa ruchojmilal.

⁶Roma ri' kan man jun bey xtitzaq. Y jantape' xtinatex.

⁷Rija' man xtuxibij ta ri' toq nrak'axaj jun rutzijol richin ruk'ayewal. Ri ránima kan jikil k'a, kan kuqul k'a ruk'u'x rik'in ri Jehová.

⁸Rija' kan kow k'o, y roma ri' man nuxibij ta ri'. Kan yerutzu' k'a ri e etzelanel richin toq nikitej poqon.

⁹Rija' kan man k'ek' ta; kan yeruto' ri man jun k'o kik'in. Ri ruchojmilal kan jari' ri nuben jantape'. Rija' xtuk'ul ruwaq'ijaj jantape'.

¹⁰Jak'a toq ri wineq banoy etzelal nutz'et re', kan xtiyakatej royowal. Kan xtuqach'ach'ila' rey roma ri royowal y xa xtipe ruyabil. Keri' ri kirayibel ri e banoy taq etzelal, xa xtik'is.