Read Kaqchikel Sal 115 Bible Online

Sal 115 - Kaqchikel bible

Sal 115

¹Man chiqe ta k'a roj Jehová ri ruwaq'ijaj, xa kan awichin rat, roma ri awajowabal ri man k'isel ta, y roma man yojamalij ta kan.

²Ri winaqi' ri man yatkitzeqelibej ta yojkiyojobej y nikibij: ¿Akuchi k'a k'o-wi ri ki-Dios?

³Ri qa-Dios roj k'o k'a chila' chikaj. Ronojel ri nurayij chi nuben, kan rubanon.

⁴Jak'a ri ki-dios rije' xa rik'in saqipueq y q'anapueq kibanon-wi. Xa kisamaj k'a ri winaqi'.

⁵K'o kichi', jak'a xa man yech'on ta: K'o runaq' taq kiwech, jak'a xa man yetzu'un ta:

⁶K'o kixikin, jak'a xa man ye'ak'ex ta: K'o kitza'n, jak'a xa man yeseqon ta:

⁷K'o kiq'a', jak'a xa man jun nikichop: K'o kaqen, jak'a xa man yebiyin ta: K'o kiqul, jak'a xa man yech'on ta.

⁸Kan e achi'el k'a re wachibel re', e keri' ri winaqi' ri yebanon kichin; e keri' chuqa' konojel ri nikikuquba' kik'u'x kik'in.

⁹Rix nuwinaq israelita tikuquba' ik'u'x rik'in ri Jehová. Ja rija' ri ito'onel y chajinel iwichin.

¹⁰Chuqa' rix ri ix sacerdote, tikuquba' ik'u'x rik'in ri Jehová. Ja rija' ri ito'onel y chajinel iwichin.

¹¹Ri k'o rukiy ri Jehová chikiwech, kan tikikuquba' kik'u'x rik'in. Ja rija' ri to'onel y chajinel kichin.

¹²Kan xojoqaqa chuk'u'x, y kan xqojrurtisaj. Xtrurtisaj ri e rijatzul kan ri Israel; xkerurtisaj chuqa' ri e rijatzul kan ri Aarón.

¹³Xkerurtisaj k'a ri k'o rukiy ri Jehová chikiwech, chi ch'uti'q chi nima'q.

¹⁴Ri Jehová kan xtuben chike chi xkewinaqir, rije' y ri kijatzul.

¹⁵Kan utz ruwa-iq'ij rix ri ix richin ri Jehová, ri Jehová ri xbanon ri kaj y ri ruwach'ulew.

¹⁶Ri kaj kan richin k'a ri Jehová. Jak'a ri ruwach'ulew kan ruya'on k'a chiqe roj.

¹⁷Man ja ta ri e kaminaqi' ri yeya'on ruq'ij ri Jehová, roma ri maneq chik kik'aslen man jun chik yetikir nikibij.

¹⁸Jak'a roj ri k'a oj k'es na, kan jantape' k'a xtiqanimirisaj ruq'ij ri Jehová, re wakami y keri' tibe-q'ij tibe-seq. Tiya' ruq'ij ri Jehová.