Read Kaqchikel Sal 116 Bible Online

Sal 116 - Kaqchikel bible

Sal 116

¹Yin kan ninwajo' ri Jehová, roma toq yin xink'utuj utzil chire, rija' kan xirak'axaj.

²Roma rija' kan xuya' ruxikin chire ri nuch'abel. Roma ri' kan ronojel k'a q'ij xkich'on rik'in.

³Yin kan chuwi' kamik chik k'a ink'o-wi. Ri rukiy ri jul muqbel kamineq xa kan xoqaqa yan k'a chuwij. Xa kan ruyon chik k'a bis y q'axo'n ri wilon.

⁴Jari' toq xinnataj rubi' ri Jehová, y xink'utuj chi rija' kirukolo'.

⁵Ri Jehová kan koch'onel y kan choj ri nuben. kan joyowanel-wi k'a ri qa-Dios roj.

⁶Ri Jehová kan yeruto' k'a ri man kinimirisan ta ki'. Toq yin man yitikir ta chik ninto-wi', rija' xirukol.

⁷Wakami yikikot roma ri Jehová kan utz xuben wik'in.

⁸Ri Jehová kan xirukol k'a chuwech ri kamik. Xuya' wuchuq'a' richin man xinoq' ta chik. Y xuya' ruchuq'a' ri waqen richin man xijilijo' ta.

⁹Yin ninwajo' yik'ase' y man jani yiken, richin ninsamajij y ninya' ruq'ij.

¹⁰Kan kuqul-wi nuk'u'x, stape' ri nuq'axo'n kan janila nim.

¹¹Roma ri nuq'axo'n kan xinmalij k'a nuk'u'x, xinbij k'a chi konojel winaqi' xa e tz'ukuy taq tzij.

¹²¿Achoq ik'in ta k'a xkitikir xtintojbej chire ri Jehová, pa ruk'exel ronojel ri rutzil ri rubanon wik'in?

¹³Xtinsuj k'a vino chire richin jun sipanik, richin matioxinik.

¹⁴Wakami kan xtinben k'a ri nusujun chire ri Jehová, y xkinkitz'et k'a konojel ri nuwinaq.

¹⁵Ri Jehová kan nupoqonaj k'a kiwech ri e ralk'ual rija' toq ye'apon chuwech ri kamik.

¹⁶Jehová, kan qitzij na wi chi yin in asamajel rat. Xkatinsamajij achi'el xarusamajij ri nte', roma kan xinawelesaj-pe chupan ri ximonri'il.

¹⁷Kan xtinsuj jun sipanik richin matioxinik chawe. Jak'a ri abi' rat ri xtinnataj beneq ruwech.

¹⁸Wakami kan xtinben k'a ri nusujun chawe, y xkinkitz'et k'a konojel ri nuwinaq,

¹⁹chupan k'a ri ruwa-jay richin ri awachoch, y chupan k'a ri tinamit Jerusalem. Kan tinimirisex k'a ruq'ij ri Jehová.