Read Kaqchikel Sal 126 Bible Online

Sal 126 - Kaqchikel bible

Sal 126

¹Toq ri Jehová xuya' q'ij chiqe richin xojtzolin-pe pa ximonri'il, xqana' achi'el xa ta jun achik'.

²Kan xojtze'en k'a, y xojsik'in roma kikoten. Kan xqabixaj bix richin xojkikot. Jari' toq ri man nikitzeqelibej ta ri Dios xkibij; Ri Jehová kan xuben nima'q taq banobel kik'in re winaqi' re', xecha'.

³Ja', kan nima'q taq banobel k'a ri xuben ri Jehová qik'in roj, y roma ri' kan xojkikot.

⁴Jehová tabana' chiqe chi xqojbe ta chik pa jotol, kan achi'el k'a ri tz'iran ruwach'ulew ri nik'ases toq niqaqa ri job.

⁵Ri wineq nuben-qa ri rutiko'n rik'in oq'ej, jak'a rik'in kikoten xtuk'ol ri ruwech.

⁶Stape' rik'in oq'ej beneq ri uk'uayon ri ija'tz, jak'a kan nixiban roma kikoten xtitzolej-pe y pa taq q'etaj trigo ruk'amon-pe.