Read Kaqchikel Sal 141 Bible Online

Sal 141 - Kaqchikel bible

Sal 141

¹Jehová, kan awik'in rat yich'on-wi, tabana' utzil katanpe chi'anin. Tawak'axaj k'a ri nuch'abel toq yich'on awik'in.

²Ri nuch'owen, kan nijubulin ta napon chawech achi'el ri jubulej pom. Ri nuq'a' ri nuyakon chawech, kan xtiqa' ta k'a chawech, achi'el ri kamelabel ri nisuj chawe tiqaq'ij.

³Nimalej Jehová, tabana' utzil man taya' q'ij chi yenbila' ch'abel ri man ruk'amon ta. Kan tachajij k'a ri nuchi' richin man jun itzel ninbij.

⁴Man taya' q'ij, chi ri wánima nikikot rik'in ri etzelal, chi yin ninben ri itzel taq banobel, ri kan man niqa' ta chawech. Man taya' q'ij chi yin yinimaq'ijun kik'in winaqi' ri e banoy etzelal.

⁵Wi ta jun wineq ri choj ruk'aslen yirujich'aj, ri' kan jun utzil chuwe yin, y wi yiruch'olij, kan jun k'a jubulej aq'om chuwe yin. Ronojel re' yin man ninwixowaj ta, roma utz nuben chuwe; stape' keri' yin jantape' xkich'on rik'in Dios.*f124*

⁶Ri e q'atoy taq tzij kichin rije' kan xkebek'aq k'a pe k'a pa siwan, y keri' ri e banoy etzelal xtiketamaj chi ri ch'abel ri xinbij yin kan qitzij wi.

⁷Ri kibaqil rije' kan xkek'aq k'a kan chuchi' ri jul richin muqbel, achi'el toq yeban boloj y k'a nik'oje' na kan k'olok'eq ulew chupan.

⁸Jak'a yin kan ja rat Jehová wajaw, ri at nutzuliben. Kan kuqul nuk'u'x awik'in. Roma ri' man tawisq'opej ri nuk'aslen.

⁹Kinajech'ej chuwech ri pikbel ri kiya'on pa nubey; chuwech ri pikbel ri kibanon ri e banoy taq etzelal.

¹⁰Jak'a ri e banoy taq etzelal, kan ta ja rije' ri xketzaq chupan ri pikbel ri', rokik yin yiq'ax, y man jun xtink'uluwachij.