Read Kaqchikel Sal 143 Bible Online

Sal 143 - Kaqchikel bible

Sal 143

¹Nimalej Jehová, tabana' utzil tawak'axaj ri nuch'owen. Tawak'axaj toq nink'utuj utzil chawe. Tak'uluba-pe ri nuch'abel, roma rat kan naben ri nabij y kan pa ruchojmilal naben ronojel.

²Man yinaya' pa latz', yin ri in asamajel; roma man jun ri ruyon ta xtuben-qa chi man aj-mak ta chawech rat.

³Ri etzelanel wichin kan chaq in rutzeqeliben k'a. Rija' xiruqasaj yan pan ulew. In ruya'on pa jun q'equ'm, achi'el ri jul richin kamineq.

⁴Yin kan xinmalij k'a nuk'u'x; ri wánima kan xmayamo' yan qa.

⁵Noqaqa chinuk'u'x ri q'ij richin ojer. Ninquqa' rij ronojel ri meyel taq abanobal, rat Jehová. Ninch'ob rij ri nimalej awuchuq'a'.

⁶Ninyek k'a ri nuq'a' chawech richin nink'ul to'onik. Ri wánima kan at royoben, achi'el ri ruwach'ulew ri chaqi'j-chaqi'j rubanon roma maneq ruya'.

⁷Tabana' utzil Jehová, tak'uluba-pe ri nuch'abel chi'anin roma yin xa yiken yan qa. Man tawewaj-awi' chinuwech, man taben chuwe chi in achi'el chik jun kamineq.

⁸Tabana' chuwe chi ri pa taq nimaq'a' xtintz'et ta ri awajowabal, roma kan nukuquban nuk'u'x awik'in. Tak'utu' chinuwech ri bey ri akuchi k'o chi yibe-wi, roma awik'in rat yich'on-wi.

⁹Nimalej Jehová, kinakolo' chikiwech ri e etzelanel wichin roma kan xaxe awik'in rat ninto-wi-wi'.

¹⁰Tak'utu' chinuwech chi ninben ri niqa' chawech, roma kan ja rat ri at nu-Dios; rik'in ri awajowabal xkinayuqej chupan ri ruchojmilal.

¹¹Tabana' utzil Jehová, pan abi' k'a rat xkik'ase' yin. Rik'in ri awutzil xkinawelesaj chupan ri q'axo'n.

¹²Roma ri awajowabal pa nuwi', xke'akamisaj ta k'a ri e etzelanel wichin. Konojel ri nikajo' yinkikamisaj kan ta xke'ak'is roma yin kan in asamajel.