Read Kaqchikel Sal 144 Bible Online

Sal 144 - Kaqchikel bible

Sal 144

¹Nimalej ruq'ij ri Jehová, ri nuto'onel; ri kan nuben chuwe richin yitikir ninben oyowal.

²Rija' yirajo', roma ri' yiruchajij. Nuya' wuchuq'a', y yirukol. Nutobal yin, ri kan nukuquban nuk'u'x rik'in. Ja rija' ri nibanon chi ri winaqi' yek'oje' chuxe' ri nutzij yin.

³Nimalej Jehová, ¿achike ta k'a ok ri wineq richin kan naquqa-pe rij? ¿achike ta k'a ok ri wineq richin chi napoqonaj janila?

⁴Ri wineq xa kan chi'anin niq'ax-el, achi'el ri kaq'iq'. Ri q'ij richin ri ruk'aslen xa achi'el ok ri muj ri xa chi'anin niq'ax.

⁵Nimalej Jehová, tajaqa' k'a ri kaj y kaqaqa-pe. Ke'achapa' ri juyu' richin ye'el-pe sib chupan.

⁶Tak'aqa-pe ri koyopa' richin nikitaluj-el-ki' ri e etzelanel awichin. Tak'aqa-pe ri ach'ab richin ye'animej.

⁷Kan k'a chila' chikaj tayaka' ri aq'a' pa nuwi'; kinakolo', y kinawelesaj chupan re jun achi'el palou re'. Kinawelesaj chikiwech ri man e nuwinaq ta.

⁸Rije' man jun bey nikibij ri qitzij. Stape' nikijikiba' ri kitzij, man jun bey nikibij ri qitzij.

⁹Jak'a yin, nimalej Dios, kan xtinbixaj jun k'ak'a' bix chawe. Xkiq'ojoman rik'in ri salterio y rik'in ri jun q'ojom ri ruk'uan lajuj ruwech k'an.

¹⁰Rat Jehová, ri yaya'on ch'akonik chike ri e rey. Rat ri xakolon richin ri David ri asamajel chuwech ri espada.

¹¹Kinakolo' y kinawelesaj chikiwech ri man e nuwinaq ta, rije' man jun bey nikibij ri qitzij. Stape' nikijikiba' ri kitzij, man jun bey nikibij ri qitzij.

¹²Tabana' chi ri qak'ajol kan chi'anin xkek'iy, achi'el jun ti che' ri rex-rex nitzu'un; ri qami'al kan xkek'iy ta choj-choj achi'el ri pilar ri e chapayon richin ri rachoch ri rey.

¹³Chuqa' ri qak'ujay kan jantape' k'a xtinoj rik'in jalajoj ruwech ixin; ri qawej kan jantape' k'a xkek'iyer, y kan janila chi awej ri xkek'oje' chupan ri qulew.

¹⁴Ri qawákix kan jantape' k'a xkek'oje' kal; ri e etzelanel qichin man yetikir ta nikijeq jun chik bey richin ye'ok-pe qik'in. Man xqojuk'uex ta chik el pa ximonri'il. ni man xtak'axatej ta raqoj-chi'ij richin xibinri'il pa taq bey.

¹⁵Jebel ruwa-ruq'ij ri tinamit, ri k'o ronojel re' rik'in; jebel ruwa-ruq'ij ri tinamit ri ja ri Jehová, ri ru-Dios.