Read Kaqchikel Sal 146 Bible Online

Sal 146 - Kaqchikel bible

Sal 146

¹Tinimirisex k'a ruq'ij ri Jehová. Kan xtinya' k'a ruq'ij ri Jehová rik'in ronojel wánima.

²Kan xtinya' k'a ruq'ij ri Jehová chijun ri nuk'aslen; kan xkibixan chire ri nu-Dios, rokik in k'es chuwech re ruwach'ulew.

³Man tikuquba' ik'u'x kik'in ri e tata'al, man tikuquba' ik'u'x kik'in winaqi', ri xa man yetikir ta yixkikol.

⁴Roma rije' xa yeken, nel-el ri uxla' kik'in y yetzolej chupan ri poqolaj; y kan chupan ri q'ij ri' niken kik'in rije' ronojel ri kich'obonik.

⁵Jebel ruwa-ruq'ij ri wineq, ri kan ja ri qa-Dios roj israelita ri nito'on richin, ri kan nukuquba' ruk'u'x rik'in ri Jehová ri qa-Dios.

⁶Roma ja rija' xbanon ri kaj y ri ruwach'ulew, xuben chuqa' ri palou y ronojel ri ek'o chupan; ri kan jantape' nuben ri nubij.

⁷Ri Jehová kan nuben ri ruchojmilal kik'in ri yetz'ilox. y kan nuya' kiway ri yewayjan. Kan yerukol k'a ri ek'o pa ximonri'il.

⁸Ri Jehová kan nuben chike ri e moyi' chi yetzu'un. Kan yeruyek k'a ri e tzaqineq. Kan yerajo' k'a ri choj kik'aslen.

⁹Ri Jehová kan yeruchajij ri e aj juk'an chik ruwach'ulew. Ri meba'i' y ri malkani' kan yeruq'axaj k'a. Jak'a kan nusech kik'u'x ri e banoy taq etzelal.

¹⁰Ri Jehová kan xtuq'et k'a tzij jantape'. Xtuq'et k'a tzij pa ruwi' ri Sión tibe-q'ij tibe-seq. Kan tinimirisex k'a aq'ij rat Jehová.