Read Kaqchikel Sal 147 Bible Online

Sal 147 - Kaqchikel bible

Sal 147

¹Tinimirisaj ruq'ij ri Jehová, roma kan utz wi chi niya'ox ri bix chire ri qa-Dios. Kan jebel y kan ki' toq niya'ox ruq'ij rija'.

²Ri Jehová nupaba' chik q'anej ri tinamit Jerusalem; Kan xkeruk'en chik pe konojel ri winaqi' ri e talutajineq.

³Rija' yeraq'omaj ri niq'axon ri kánima, kan nupis k'a ri kisokotajik.

⁴Kan xuch'ob janipe' ch'umila' yek'oje', chikijujunal rije' yeroyoj rik'in ri kibi'.

⁵Ri qajaw roj kan k'o janila nim ruq'ij, y kan janila uchuq'a' rik'in. Ri runojibal kan maneq ruchi'.

⁶Ri Jehová nunimirisaj kiq'ij ri kiqasan-ki' chuwech. Jak'a ri e banoy taq etzelal kan yeruqasaj k'a pan ulew.

⁷Kixbixan rik'in matioxinik richin niya' ruq'ij ri Jehová; tiq'ojomaj ri arpa richin niya' ruq'ij ri qa-Dios.

⁸Ja rija' nibanon chi ri kaj ninoj ruwech chi sutz'. Nunaba' k'a ri job richin nuya'aj ri ruwach'ulew. Chuqa' nuben chi nik'iy-pe ri q'ayis pa taq juyu'.

⁹Rija' nitzuqun kichin ri awej; yerutzuq chuqa' ri taq ral ri qo'ch.

¹⁰Rija' man nukuquba' ta ruk'u'x kik'in ri kiej chupan jun oyowal, ni man nukuquba' ta ruk'u'x kik'in aj-labal.

¹¹Ri Jehová nikikot kik'in ri winaqi' ri k'o rukiy chikiwech, kik'in ri koyoben ri rutzil rija'.

¹²Tinimirisaj k'a ruq'ij ri Jehová, rix aj-Jerusalem. Tiya' k'a ruq'ij ri Dios, rix aj-Sión;

¹³roma ja rija' nichajin ri tinamit ri'. Kan nuya' k'a urtisanik pan iwi' rix.

¹⁴Ja rija' ri niya'on ri uxlanen chupan ri iruwach'ulew. Rija' nuya' pa ruk'iyal ri trigo richin yixnoj jebel.

¹⁵Ri ruch'abel rija' kan nuteq k'a pe chuwech re ruwach'ulew; ri nubij rija', kan chi'anin nitalutej rutzijol.

¹⁶Nuya' k'a pe k'iy raxq'ab y kan achi'el ri rupimil ri lana nuben chire. Toq nuya-pe ri chuma-tew kan achi'el chaj nuben-pe chire.

¹⁷Nuya' k'a pe ri saqboch y kan achi'el taq abej kibanik. ¿Achike ta k'a nikoch'on ri rutewul ri saqboch ri'?

¹⁸Xaxe rik'in ri ruch'abel ri Jehová, yeya'er-qa ronojel re'. Rik'in jun kaq'iq', yebiyin-el ronojel ri ya' ri'.

¹⁹Ri ruch'abel kan xuk'ut k'a chikiwech ri e rijatzul kan ri Jacob. Ri jalajoj ruwech rupixa' xuk'ut chuwech ri tinamit Israel.

²⁰Y re' kan man rubanon ta kik'in ri man nikitzeqelibej ta rija'. Ri man ketaman ta ri rupixa'. Kan tinimirisex k'a ruq'ij ri Jehová.