Read Kaqchikel Sal 148 Bible Online

Sal 148 - Kaqchikel bible

Sal 148

¹Tinimirisex ruq'ij ri Jehová k'a chila' chikaj. Konojel ri ek'o chila' chikaj kan tikinimirisaj ruq'ij rija'.

²Chi'iwonojel rix ri ix aj-chikajil rusamajela' ri Dios kan tiya' ruq'ij. Chi'iwonojel ri ixk'o chikaj, kan tinimirisaj ruq'ij.

³Ri q'ij y ri ik' kan tikiya' ruq'ij ri Jehová, keri' chuqa' ri ch'umila' ri yech'ich'an-pe chila' chikaj, tikiya' ruq'ij.

⁴Ri kaj chi tz'etel y man tz'etel ta tikiya' ruq'ij ri Dios, keri' chuqa' ronojel ri sutz' ri ek'o chuxe' ri kaj.

⁵Konojel re' tikiya' ruq'ij ri Jehová, roma ja rija' xbanon kichin.

⁶Kan xeruya' pa kik'ojelibal richin q'asen. Xuya' kan ruchojmilal pa kiwi', ri kan man jun xtiyojo.

⁷Ronojel ri ruwach'ulew tikiya' ruq'ij ri Jehová, Chuqa' konojel ri nima'q taq chikopi' ri ek'o chupan ri palou, y ri ek'o-qa más nej chupan ri ya'.

⁸Konojel re' tikiya' ruq'ij ri Jehová: Ri koyopa', ri saqboch, ri raxq'ab, ri sutz', keri' chuqa' ri nimalej kaq'iq' ri kan nuben ri nubij ri Dios;

⁹chuqa' ri juyu' y ronojel ri ruwa taq juyu', ri che' ri nikiya' kiwech y ronojel ri tiox-che';

¹⁰konojel ri chikopi' ri e richin k'echelaj y konojel ri ye'awajix, ri taq kokoj chikopi' y ri yexik'an pa kaq'iq';

¹¹konojel ri e rey kichin ri ruwach'ulew y konojel ri winaqi', ri e tata'al y konojel ri aj-raqen pa kiwi' ri winaqi';

¹²konojel ri alaboni' y chuqa' konojel ri xtani', ri e rijita'q taq winaqi' y chuqa' konojel ri ak'uala'.

¹³Konojel re' tikibixaj ri rubi' ri Jehová, roma xa kan xaxe k'a ri rubi' rija' ri ruk'amon chi ninimirisex. Ri ruk'ojlemal rija' kan k'o k'a pa ruwi' ri kaj y ri ruwach'ulew.

¹⁴Rija' kan ruya'on k'a nimalej uchuq'a' chire ri rutinamit, konojel ri israelita kan tikiya' ruq'ij, roma ja rije' ri ek'o más naqaj chire rija'. ¡Kan tinimirisex k'a ruq'ij ri Jehová!