Read Kaqchikel Sal 149 Bible Online

Sal 149 - Kaqchikel bible

Sal 149

¹Tinimirisex ruq'ij ri Jehová Tibixex k'ak'a' taq bix chire ri Jehová; rix ri kan ix richin rija', tiya' ruq'ij chupan ri imolojri'il.

²Ri israelita kan kekikot k'a rik'in ri xbanon kichin. Ri aj-Sión, kan kekikot k'a rik'in ri ki-rey.

³Kan tibixex k'a ri rubi' y ketzopin roma kikoten. Rik'in ri pandero y ri arpa kebixan richin nikiya' ruq'ij.

⁴Roma ri Jehová kan nikikot rik'in ri rutinamit. Ri kiqasan-ki' chuwech kan nuya' ch'akonik chike.

⁵Kan kekikot k'a ri kan nikiben ri nubij rija'. Kan kebixan k'a stape' ek'o chik pa kich'at.

⁶Tinimirisaj ruq'ij ri Dios rik'in kikoten, rokik ik'uan pan iq'a' ri espada ri ka'i' rey,

⁷richin niben ruk'exel chike ri winaqi' ri man nikitzeqelibej ta ri Dios, richin niya' rutojbalil-mak chike ri winaqi' ri';

⁸richin ye'ijitz' rik'in ch'ich' ri ki-rey, ri e tata'al y ri achi'a' ri k'o kiq'ij kan ke'ijitz'a' rik'in cadena;

⁹richin niben kik'in rije' achi'el ri tz'ibatel kan pa kiwi'. Ronojel re' kan jun ruwaq'ijaj kichin ri rutinamit ri Dios. ¡Kan tinimirisex ruq'ij ri Dios!