Read Kaqchikel Sal 17 Bible Online

Sal 17 - Kaqchikel bible

Sal 17

¹Jehová, rat atz'eton chi yin maneq numak, tawak'axaj k'a ri nuch'abel. Tabana' utzil tawak'axaj ri nuch'owen, roma re' kan man richin ta q'oloj.

²Tabana' utzil, taq'alajirisaj-pe ri ruchojmilal pa nuwi', tatz'eta' ri rubeyal ri nuk'aslen.

³Rat kan atzuliben k'a ri wánima chi paq'ij chi chaq'a'. Kan in atejtoben y man jun itzel awilon chuwij, roma yin kan nubin chi kan man jun etzelal ri xtinbij.

⁴Yin man xtinben ta achi'el ri nikiben ri ch'aqa' chik winaqi', ri nubanobal kan achi'el k'a ri nubij ri ach'abel, kan nuch'aron k'a wi' chire ri kibey ri e banoy taq etzelal.

⁵Kan nutzeqeliben ri abey, roma ri' kan man yitzaq ta.

⁶Nu-Dios, yin yich'on-q'anej awik'in, roma kan yinawak'axaj. Nink'utuj utzil chawe chi jantape' ta xtawak'axaj ri nuch'abel.

⁷Tak'utu' k'a ri nimalej ajoyowanik. Tak'utu' chi rat kan ye'akol-wi ri nikito-ki' awik'in, kan ye'akol chuwech ri e etzelanel kichin.

⁸Kinachajij k'a achi'el nachajij ri runaq' taq awech; kinakuchu' chuxe' ri amujal rat.

⁹Kinawewaj chikiwech ri yetz'ilo wichin, chikiwech ri e etzelanel wichin ri kan nikajo' yinkikamisaj.

¹⁰Re winaqi' re' kan man jun chik joyowanik kik'in, kan nikibananej k'a toq yech'on.

¹¹Rije' kan in kitzeqeliben y kan kisutin-wij; in kitzuliben richin yinkitzeq.

¹²Rije' e achi'el jun koj ri royoben richin k'o niqaqa pa ruq'a', chuqa' achi'el ri alaj koj ri rewan-ri' richin niq'eleben.

¹³¡Jehová, kayakatej! ¡tapaba-awi' chikiwech! Rik'in ri akamisabal kinakolo' chikiwech ri e banoy taq etzelal.

¹⁴Rik'in ri aq'a' kinakolo' chikiwech re winaqi' re'; ri xa rik'in re ruwach'ulew kikuquban kik'u'x, ri xa rik'in re k'aslen chuwech re ruwach'ulew yekikot-wi; ri kan nikinojisaj ri kipan rik'in ri abeyomel rat; rik'in ri' yekitzuq ri kalk'ual y kan k'a k'o nik'oje' kan chike ri kiy-kimam.

¹⁵Jak'a yin kan xtikuqer nuk'u'x toq xtinbentz'eta' awech; kan xtikuqer nuk'u'x toq xkik'astej chik q'anej awik'in rat.