Read Kaqchikel Sal 18 Bible Online

Sal 18 - Kaqchikel bible

Sal 18

¹Jehová, yin kan janila yatinwajo', roma kan ja rat yaya'on wuchuq'a'.

²Jehová, rat kan at achi'el k'a jun abej ri ninwewaj-wi' chirij, achi'el jun jay ri akuchi utz ninto-wi-wi'. rat kan yinakol-wi. Kan xtinkuquba' k'a nuk'u'x awik'in. ja rat ri at nutobal yin. rat yinakol chikiwech ri e etzelanel wichin y ja rat yato'on wichin chuwech ronojel.

³Kan ninnataj k'a ri abi' rat Jehová, roma kan ruk'amon richin niya'ox aq'ij-ak'ojlen. Kan yinakol k'a chikiwech ri e etzelanel wichin.

⁴Ri kamik kan xsutin k'a chuwij. Jalajoj k'a ruwech etzelal xrojqaj-ri' chuwij, roma ri' kan janila xinxibij-wi'.

⁵Ri kamik xurarij k'a chuwaqen achi'el jun kolo'. Kan xuben k'a chuwe richin xiqaqa chupan ri pikbel richin kamik.

⁶Chupan k'a ri nimalej bis ri' xich'on rik'in ri Jehová, xink'utuj utzil chire richin yiruto'. Rija' kan xirak'axaj-pe k'a ri akuchi-k'o-wi, ri nuch'owen rik'in, xapon k'a chuwech rija' y kan xrak'axaj.

⁷K'ari' xpe jun nimalej silonel; y kan xesilon k'a ri ruxe' ri juyu'. Kan chijun k'a ruwach'ulew xsilon roma kan xpe royowal ri Jehová.

⁸Roma ri royowal, ri pa rutza'n kan xel k'a pe sib; ri pa ruchi' kan xel-pe q'aq' ri kan nuk'is ronojel; kan xk'a'on k'a ri racheq-q'aq'.

⁹Xujeq k'a ri kaj, y xqaqa k'a pe, y xpa'e' k'a pa ruwi' ri q'eqel-sutz'.

¹⁰Xch'oke' k'a el chirij jun querubín,*f16* y xexik'an-el pa kaq'iq'.

¹¹Chupan k'a ri q'eqel-sutz' xupis-wi-ri'. Ri sutz' ri' kan q'eq-q'eq rubanon, achi'el nuben toq niqaqa yan jun kamik job.

¹²Chupan k'a ri sutz' ri' xel-pe rusaqil ri Jehová. Jari' toq xqaqa-pe saqboch, koyopa' y q'aq'.

¹³Ri nimalej Jehová xch'on k'a pe chupan ri sutz' ri'. kan janila kow xch'on achi'el niq'ajan ri koqolajay.

¹⁴Nuk'eq k'a pe koyopa' achi'el xa ta ch'ab. Y rik'in re' xuben chi xkitaluj-el-ki' ri e yakatajineq chuwij.

¹⁵Xeri' xbeq'alajin-pe ri nima'q taq siwan ri ek'o chupan ri palou, y kan xtz'etetej k'a ri ruxe' ri ruwach'ulew. Ronojel re' xa roma ri ruch'abel ri Jehová, roma ri nimalej ruxla'.

¹⁶Ri Dios kan k'a chila' chikaj k'a xuya-pe ri ruq'a' chuwe. Xirelesaj k'a chupan ri janila chi ruk'ayewal achi'el xa ta xirelesaj chupan jun palou.

¹⁷Xirukol pa ruq'a' ri más nim etzelanel wichin, stape' rije' kan más e k'iy y kan más kuchuq'a' chinuwech yin.

¹⁸Xinkichop k'a toq yin ink'o pa ruk'ayewal. Y kan jari' toq xiruto' ri Jehová.

¹⁹Ja ri Jehová xikolon y xiruya' ri akuchi kan janila jebel. Roma kan janila yirajo' xirelesaj chupan ri ruk'ayewal.

²⁰Ri Jehová xuya' k'a ri ch'akonik chuwe yin. Roma ri ruch'ajch'ojil ri wánima, xuya' chuwe ri ruk'amon.

²¹Yin kan nuchajin k'a wi' chuwech ri Jehová; kan man nuch'aron ta k'a kan wi' chupan ri bey ri richin ri Dios.

²²Kan nintzeqelibej k'a ri rupixa' ri Dios, roma chuwe yin achi'el jun utzilej bey. Y kan man xtinch'er ta k'a kan wi' chire.

²³Yin kan choj k'a in biyineq chuwech rija', y kan nuch'aron k'a wi' rik'in ronojel ruwech etzelal.

²⁴Roma ri ruch'ajch'ojil ri wánima chuwech ri Jehová, xa roma ri' rija' k'o xuya' chuwe.

²⁵Roma rat Jehová kan man namalij ta ri man yarumalij ta rat. Kan choj k'a naben rik'in ri choj nibiyin chawech.

²⁶Rat kan at utz rik'in ri utz ruk'aslen. Jak'a kan naya' rutojbalil-mak pa ruwi' ri man nutzeqelibej ta ri abey.

²⁷Rat kan ye'akol ri nikiqasaj-ki' chawech. Chuqa' kan naqasaj kiq'ij ri kinimirisan-ki' chawech.

²⁸Ja rat Jehová ri yasaqirisan ri nubey. Rat k'a yasaqirisan chupan ri q'equ'm.

²⁹Rik'in ri awuchuq'a' rat, yin yitikir yenk'is jun tzobaj aj-labal. Chuqa' yitikir yentzeq ri nima'q taq tz'aq richin ri kitinamit rije'.

³⁰Ri Jehová kan choj-wi ri rubey, y ri rupixabanik kan janila ch'ajch'oj achi'el ri q'anapueq ri ya'erisan pa q'aq'. Rija' kan yeruto' k'a konojel ri nikikuquba' kik'u'x rik'in.

³¹Roma ri' xa kan xaxe k'a ri Jehová ri Dios k'o. Kan man jun chik achike ta xtito'on qichin.

³²Ja rija' ri niya'on ronojel wuchuq'a'. Kan nuk'ut k'a chinuwech ri chojilej bey.

³³Kan xuya' wuchuq'a' richin anineq xibiyin chupan ri k'echelaj, achi'el nanin jun masat.

³⁴Ja rija' ri nibanon chuwe richin yich'akon pan oyowal. Nuben chuwe richin yitikir ninkusaj ri rute-ch'ab ri banon rik'in q'enq'oj-pueq.

³⁵Ja rija' ri niya'on ri ch'akonik chuwe. Rija' kan yirutemej, y kan yiruto' richin yibe pa jotol.

³⁶Kan nutaq'ajuj k'a ri nubey, richin yin man yijilijo' ta.

³⁷Yin kan xentzeqelibej ri e etzelanel wichin y kan xenq'i'. Man xitzolin ta, k'a xenkamisaj na kan konojel.

³⁸Kan xenxeq' kan konojel, y xepunupuxin kan ke taq ri'.

³⁹Ri Jehová xuya' wuchuq'a' richin xich'akon. Xuben chike ri e etzelanel wichin richin xkiqasaj-ki' chinuwech.

⁴⁰Xuben k'a chi ri e etzelanel wichin xa xe'animej-el chinuwech. Keri' kan xich'akon k'a chikij.

⁴¹Xkik'utuj k'a kito'ik, jak'a man jun xto'on kichin. Kan xkoyoj k'a chuqa' ri Jehová, jak'a rija' man xerak'axaj ta.

⁴²Kan xenxeq' chi'aqen richin xe'ok poqolaj ri nuk'uaj ri kaq'iq'. Kan xenwelesaj k'a el achi'el toq nik'aq ri ch'abeq pa taq bey.

⁴³Ri Jehová kan xirukol k'a chuwech ri koyowal ri winaqi' ri man nikitzeqelibej ta rija', kan xuben chuwe richin xinok aj-raqen pa kiwi'. Y re wakami xuben chike ri winaqi' ri man wetaman ta kiwech chi xinkisamajij.

⁴⁴Kan xaxe k'a xkak'axaj ri nuch'abel, kan xkinimaj ri nutzij. Chuqa' ri man e nuwinaq ta, kan xkiqasaj-ki' chinuwech.

⁴⁵Kan xelawalo-qa roma xibinri'il. Y kan yek'ark'ot k'a ye'el-pe ri akuchi kewan-wi-ki'.

⁴⁶Nimalej ruq'ij ri Jehová roma ja rija' ri tobel wichin yin. Xtinnimirisaj k'a ri nu-Dios, ri xya'on ri nukolotajik.

⁴⁷Ja ri Dios ri niya'on ri rutojbalil pa kiwi' ri e etzelanel wichin. Ja rija' ri yejachon pa nuq'a' ri winaqi' ri man nikitzeqelibej ta rija'.

⁴⁸Ja rija' ri nikolon wichin pa kiq'a' ri e etzelanel wichin. Kan nuben k'a chuwe chi kan yich'akon chikij ri e yakatajineq chuwij. Chuqa' kan yirukol pa ruq'a' ri wineq itzel.

⁴⁹Roma ri' yin kan xtintzijoj ri nima'q taq rubanobal chikikojol ri winaqi' ri man nikitzeqelibej ta rija'. Y roma ri' kan xtinbixaj k'a ri rubi'.

⁵⁰Ri Jehová, toq nucha' jun rey, kan nuya' ch'akonik pa ruq'a'. Nuya' ri rutzil pa nuwi' yin David, y chike ri e wijatzul richin tibe-q'ij tibe-seq.