Read Kaqchikel Sal 19 Bible Online

Sal 19 - Kaqchikel bible

Sal 19

¹Ri kaj nuk'ut chiqawech ri ruk'ojlemal ri Dios, ri raxlaj-kaj nuk'ut chiqawech ronojel ri rubanon ri Dios rik'in ri ruq'a'.

²Ri jun q'ij, nutzijoj chik chire ri jun chik q'ij, ri jun chi'aq'a', nutzijoj chik chire ri jun chik chi'aq'a', ronojel etamabel.

³Man rik'in ta k'a tzijonik nubij, man nak'axatej ta k'a ri ruch'abel;

⁴jak'a kan chuwech chijun ruwach'ulew niq'alajin-wi ri ruch'abel ri Dios, kan k'a pa ruk'isibel k'a chire re ruwach'ulew niq'alajin-wi ri ruch'abel. Chila' chikaj ri Dios xuben jun rachoch ri q'ij;

⁵y ri q'ij, ri pa taq nimaq'a' nel-pe achi'el jun achijlonel toq niyakatej-q'anej y nel-pe pa rachoch, kan nikikot achi'el jun ri maneq xibinri'il chuwech y nuchop-el binen.

⁶Nel-pe ri juk'an ruchi' ri kaj, y nibeqaqa ri juk'an chik ruchi', ¡Kan man jun k'a ri nitikir ta nrewaj-ri' chuwech ri ruk'atanal.

⁷Ri rupixa' ri Jehová kan tz'aqet y kan nuya' k'ak'a' qak'aslen; ri ruchojmilal ri xuya' ri Jehová, kan richin q'asen y nuben chire ri maneq retamabal chi nok aj-na'oj.

⁸Ri pixa' ri nuya' ri Jehová kan e choj; kan nuben chi nikikot ri ránima ri wineq. Ri ruch'abel ri Jehová, kan e ch'ajch'oj, y kan nusaqirisaj ri runaq'-ruwech ri wineq.

⁹Ri rutijonik ri Jehová kan janila utz y kan keri' richin jantape'. Ri q'atbel-tzij richin ri Jehová kan pa ruchojmilal y kan e qitzij.

¹⁰Ronojel re' kan janila e rayixel achi'el ri q'anapueq, kan más chuwech ri q'anapueq, ri e ya'erisan pa q'aq'. Kan más k'a ruki'il ke chuwech ri ruya'al kab ri nikiya' ri taq chikopi', ri nibiyin-pe chupan ri ruk'ojelibal.

¹¹Ronojel re', kan nubij k'a chire ri asamajel ri utz y ri man utz ta nuben; wi nuyek re' pa ránima, kan k'o rajel ruk'exel xtuk'ul.

¹²¿Achike ta k'a wineq ri nitikir nutz'et-qa-ri' chire ri man ja ta ri yeruben? Roma ri' tabana' utzil Jehová, takuyu' ri numak ri kan man yitikir ta nintz'et-qa yin.

¹³Tabana' utzil tachajij ri asamajel chuwech ri nimirisanen, man ta jun chire re' ri xtik'oje' ta chupan ri nuk'aslen; richin keri' xkinok tz'aqet y ch'ajch'oj chire ri mak.

¹⁴Jehová kan ta k'a xtak'awomaj ri ch'abel ri ye'el pa nuchi' y ri ninch'ob pa wánima; xtapon ta chawech rat nimalej Jehová ri at nutobal y nukolonel yin.