Read Kaqchikel Sal 22 Bible Online

Sal 22 - Kaqchikel bible

Sal 22

¹Nu-Dios yin, nu-Dios yin, ¿achike roma xinamalij kan? ¿Achike roma k'a janila nej atk'o-wi richin nawak'axaj ri nuraqoj-chi'ij y yinakol ta?

²Nu-Dios yin, ri paq'ij yich'on awik'in y kan man nak'uluba' ta pe ri nuch'abel. Chuqa' yich'on awik'in ri chaq'a' y man wilon ta uxlanen.

³Jak'a rat kan at loq'olej-wi; Y roj israelita niqaya' aq'ij.

⁴Ri qati't-qamama' kan xkikuquba' kik'u'x awik'in. Roma ri' kan xe'akol.

⁵Xkik'utuj k'a kito'ik chawe rat y kan xe'akol k'a; Xkikuquba' kik'u'x awik'in y man xek'ixbitej ta.

⁶Jak'a yin xa kan man in wineq ta chik chikiwech ri ch'aqa' chik. Xa kan in achi'el chik k'a jun jut chikiwech. Y kan in ketzelan k'a ri winaqi' richin ri tinamit.

⁷Konojel k'a ri yetz'eton wichin, kan yetze'en chuwij; Nikiyumumula' kichi', nikisilola' ri kijolon y nikibij:

⁸¡Rija' rukuquban ruk'u'x rik'in ri Dios. Wakami kan tikol k'a roma rija', roma kan qajineq chuwech!, yecha'.

⁹Jehová, rat xabanon chuwe richin xinalex rik'in ri nte'. Kan k'a yitz'uman na, toq kan ja yan ri' xinachajij.

¹⁰Kan k'a man jani k'a yinalex, kan ja yan ri' in achajin chik. Kan ja yan toq ri nte' xyawej kan chuwij, ja yan ri' rat at nu-Dios.

¹¹Roma ri' man kinaya' kan nuyon, roma ri e etzelanel wichin kan naqaj ek'o chuwe yin. Y kan man jun k'a ri achike ta xtito'on wichin.

¹²Ri winaqi' ri itzel nikina' chuwe kan kisutin k'a wij achi'el nikiben ri achija' taq wákix. Kan e achi'el k'a ri wákix ri e richin ri ruwach'ulew Basán.

¹³Kan yesik'in k'a chuwij, achi'el nikiben ri koj. Y kan nikik'eq k'a ki' chuwij.

¹⁴Ri wuchuq'a' kan xk'is yan k'a qa, achi'el nik'is ri ya' toq nitix pan ulew. Ronojel k'a ri nubaqil kan xe'el yan pa kik'ojelibal. Kan maneq chik oyobenri'il chuwe yin. Xa xk'is yan qa achi'el nik'is ri cera toq nimeq'e'.

¹⁵Ri pa nuchi' kan chaqi'j-chaqi'j k'a, kan achi'el ri poqolaj. Ri waq' kan xutz'om k'ari' ri pa nuja'j, roma ri' kan nintz'et k'a ruwech ri nukamik.

¹⁶Ri e banoy taq etzelal e yakatajineq chuwij, achi'el jun tzobaj tz'i' ri janila e k'a'el. Kan kisutin k'a wij richin nikiwech' ri nuq'a' y ri waqen.

¹⁷Yin kan nintz'et chik qa ronojel ri nubaqil. Y roma ri' ri winaqi' kan chaq in kitzuliben y yinkiyojobej.

¹⁸Ri nutziaq kan xkich'arala' k'a chikiwech, y kan xkibanala' k'a sakinik pa ruwi'.

¹⁹Rat Jehová tabana' utzil man kinaya' kan, Katanpe chi'anin richin yinato' y naya' wuchuq'a'.

²⁰Takolo' ri wánima chuwech ri kamik. Chuwech ri kuchuq'a' ri itzel taq tz'i', takolo' ri nuk'aslen.

²¹Kinakolo' pa ruchi' ri koj; chuqa' kinakolo' chuwech ri ruk'a' ri juyubel achij wákix.

²²Keri' yin kan xtintzijoj k'a ri abi' chike ri wach'alal. Xtinya' k'a aq'ij pa taq qamolojri'il.

²³Rix nuwinaq ri k'o rukiy ri Jehová chiwech, kan tiya' k'a ruq'ij.

²⁴Roma rija' kan man nupoqonaj ta k'a richin nuto' ri jun ri k'o pa q'axo'n. Kan man nrewaj ta k'a ri' chuwech ri k'o pa tijoj-poqonal. Y xa kan nrak'axaj k'a toq nuk'utuj to'onik.

²⁵Jehová, yin kan xtinbixaj k'a ri abi' chikikojol ri wach'alal. Ri nusujun chawe, kan xtinben chikiwech ri nikiya' aq'ij.

²⁶Ri kiqasan-ki' chawech kan xtikitej k'a ri kiway y kan xtinoj k'a kipan. Ri yekanon awichin, kan xtikiya' k'a aq'ij y xkek'ase' k'a richin jantape'.

²⁷Konojel k'a ri winaqi' ri e richin chijun ruwach'ulew, xkepe y xtikiya' aq'ij. Chi achijlonela', ixjayilonela' y alk'ualaxela', xtikiya' aq'ij.

²⁸Roma kan awichin rat Jehová ri ajawaren. Kan ja rat k'a ri xkaq'aton-tzij pa ruwi' chijun ri ruwach'ulew.

²⁹Konojel ri e beyoma' kan xkexuke' chawech y xtikiya' aq'ij, roma konojel re winaqi' re' xa kan xke'ok chik poqolaj, y kiyon rije' kan man yetikir ta nikiya-qa kik'aslen.

³⁰Chuqa' ri jun chik sol winaqi' kan xtikiya' aq'ij rat Jehová, kan xtikitzijoj k'a ri abanobal rat, chike ri e kijatzul chik rije'.

³¹Xtikitzijoj k'a chike ri man jani ke'alex, ri ruchojmilal y ri meyel taq abanobal.