Read Kaqchikel Sal 26 Bible Online

Sal 26 - Kaqchikel bible

Sal 26

¹Jehová tabana' utzil taq'alajirisaj chi yin man jun mak nubanon, roma yin kan tz'aqet k'a ri nubanobal chawech. nukuquban nuk'u'x awik'in y man rik'in ta ka'i' nuk'u'x.

²Jehová, kinatejtobej y tanik'oj ri wánima. Tatz'eta' ri nuch'obonik y ronojel ri k'o pa wánima,

³roma yin kan jantape' ninnataj ri awajowabal, y kan in biyineq k'a chupan ri ach'abel.

⁴Yin kan man jun bey k'a yenwachibilaj ta ri e tz'ukuy taq tzij. Kan man jun bey k'a nijunamatej ta nuwech kik'in ri xa ka'i' kipalej.

⁵Yenwixowaj ri molojri'il kichin ri e banoy taq etzelal. Y kan man jun bey k'a junan nuwech kik'in.

⁶Ninch'ej k'a ri nuq'a' richin niq'alajin chi maneq numak chawech. K'ari' yisutin chirij ri porobel richin ninya' aq'ij,

⁷y kan yich'on k'a kow richin ninya' utzilej atzijol, y yich'on pa ruwi' ri meyel taq abanobal.

⁸Kan ninwajo' ri awachoch ri akuchi atk'o-wi rat, ri akuchi k'o-wi ri ak'ojlemal.

⁹Tabana' utzil man nawelesaj nuk'aslen junan kik'in ri aj-maki'. Man naben chuwe chi junan nink'uluwachij kik'in ri e kamisanela',

¹⁰roma kik'in rije' k'o ch'obonik ri man utz ta, y kan yepuaqix kan.

¹¹Jak'a yin kan tz'aqet ri nuk'aslen yibiyin chawech. Roma ri' kinakolo' y tajoyowaj nuwech.

¹²Yin kan in jikil chawech, roma ri' kan xtinya' aq'ij chikiwech ri nuwinaq.