Read Kaqchikel Sal 28 Bible Online

Sal 28 - Kaqchikel bible

Sal 28

¹Ja ri abi' rat ninnataj Jehová, nuto'onel yin. Man k'a tapoqonaj nak'uluba-pe ri nuch'abel. Roma wi keri' xa kan in ajlan chik k'a chikikojol ri kaminaqi'.

²Tabana' utzil kinawak'axaj toq yin yich'on awik'in chupan ri awachoch, toq ninyek ri nuq'a' richin nink'utuj to'onik chawe.

³Man kinak'uaj junan kik'in ri aj-maki'; ri kan jebel k'a yech'on chire jun wineq y ri pa kánima kan k'o ri etzelal.

⁴Taya' k'a chike rije' achi'el ri kisamaj, achi'el ri itzel taq banobel ri xekiben. Taya' chike ri ruk'amon roma ri ketzelal.

⁵Roma rije' kan man xkinimaj ta k'a ri atzij rat Jehová, roma ri' rat kan ke'ak'isa' k'a. Roma kan man nikinimaj ta k'a ronojel ri xaben rat, man taya' q'ij chi xkeyakatej chik q'anej.

⁶Nimalej aq'ij rat Jehová, roma kan xawak'axaj ri nuch'owen.

⁷Rat Jehová yinato' y naya' wuchuq'a'. Yin ninkuquba' nuk'u'x awik'in, y roma ri' rat yinato'. Kan janila nikikot ri wánima, y roma ri' yibixan richin ninmatioxij chawe.

⁸Ja rat ri at uchuq'a' richin ri atinamit Israel. Chuqa' kan nakol ri rey ri acha'on rat.

⁹Jehová, takolo' y tawurtisaj ri atinamit. Tayuq'uj y taq'axaj k'a richin jantape'.