Read Kaqchikel Sal 3 Bible Online

Sal 3 - Kaqchikel bible

Sal 3

¹¡Jehová, kan janila k'a xek'iyer ri e etzelanel wichin! Kan janila k'a e k'iy ri e yakatajineq chuwij.

²Janila k'a e k'iy ri kere' nikibij chuwij: Ri Dios xa man xtukol ta, yecha'.

³Jak'a rat Jehová at to'onel wichin yin; rat ri yabanon chuwe chi k'o ruwa-nuq'ij y naben chuwe richin chi yitikir ninyek-wi'.

⁴Rik'in ri nuch'abel xatinwoyoj rat Jehová, xak'uluba-pe ri nuch'abel, k'a akuchi atk'o-wi chupan ri awachoch ri k'o pa ruwi' ri juyu'.

⁵Yin xikotz'e-qa y xiwer, xik'astej chik el, roma kan ja rat ri xato'on wichin.

⁶Roma ri' man xinxibij ta wi' chikiwech ri e 10,000 winaqi' ri xkisutij-wij.

⁷Jehová, ¡kayakatej k'a chikij! ¡Kinakolo' k'a nu-Dios yin. Tasoko' k'a ri kipalej ri e etzelanel wichin. Tawulaj k'a key ri e banoy taq etzelal.

⁸Awik'in k'a rat Jehová nipe-wi ri kolotajik ¡Taya' k'a ri urtisanik pa ruwi' ri atinamit!