Read Kaqchikel Sal 30 Bible Online

Sal 30 - Kaqchikel bible

Sal 30

¹Jehová, kan xkatinnimirisaj k'a, roma kan xinakol. Kan man xaya' ta k'a q'ij chi ri e etzelanel wichin xekikot ta chuwij.

²Jehová nu-Dios yin, xink'utuj to'onik chawe y kan xinak'achojirisaj.

³Kan xinakol k'a chuwech ri kamik. Xasipaj chik k'a nuk'aslen, richin chi man xibemuq ta kan.

⁴Tibixaj k'a rubi' ri Jehová, rix ri ix ch'aron chik. Tiya' k'a ruq'ij ri loq'olej rubi'.

⁵Ri royowal rija' kan xaxe k'a jun ti ramaj nuben. Jak'a ri rutzil xa kan man k'isel ta. Stape' k'o oq'ej ri chi'aq'a', toq niseqer-pe kan k'o chik ri kikoten.

⁶Toq yin utz ink'o, xinbij k'a chi kan man jun xtisilon wichin.

⁷Roma rat Jehová, rik'in ri awutzil xaben chuwe chi kow xik'oje', achi'el jun juyu' ri man jun nisilon richin. Jak'a toq xinna' chi xinaya' kan juba', kan xsach nuk'u'x.

⁸Chawe k'a rat Jehová xink'utuj-wi ri to'onik. Kan chawe k'a rat wajaw xink'utuj joyowanik.

⁹Xinbij k'a: ¿Achike ta k'a xtuk'en-pe ri nukamik? ¿Achike k'a xtuk'en-pe toq in muqun chik kan? ¿Kan xkitikir kami xtinya' aq'ij toq xa in poqolaj chik? ¿Kan xtitikir kami ri poqolaj ri' xtutzijoj chi man yinamalij ta kan?

¹⁰Tabana' utzil Jehová kinawak'axaj y tajoyowaj nuwech. Jehová, katok to'onel wichin yin.

¹¹Ri nuq'axo'n kan xajel k'a rik'in kikoten; xawelesaj k'a ri janila bis chuwij y xinanojisaj rik'in kikoten.

¹²Roma ri' Jehová nu-Dios, kan xtinbixaj k'a ri abi'. Man yitikir ta k'a yik'oje-qa chaq keri' chi man jun xtinbij. Xa kan xtinya' k'a aq'ij y xkimatioxin chawe richin jantape'.