Read Kaqchikel Sal 32 Bible Online

Sal 32 - Kaqchikel bible

Sal 32

¹Jebel ruwa-ruq'ij ri wineq toq ri Dios nuk'uaj-el nej ri ruyakatajinenri'il, y nikuyutej ronojel ri rumak.

²Jebel ruwa-ruq'ij ri xtibix chire roma ri Jehová chi man jun mak xtrejqalej, roma kan man jun rewan chuwech ri Dios.

³Rokik man nuq'alajirisan ta ri numak, kan yimayamo' yan qa ninna' yin. Kan chi jun q'ij k'a yijilo roma q'axo'n.

⁴Kan chi paq'ij chi chaq'a' xinna' ralal ri aq'a' rat Jehová. Kan xichaqi'j-qa jumul ninna' yin, achi'el jun kotz'i'j toq nichaqi'j-qa roma ri k'aten richin saq'ij.

⁵Jari' toq xinq'alajirisaj k'a ri numak chawech, y kan man xinwewaj ta ri wetzelal. Yin xinch'ob chi ninq'alajirisaj ri numak chawech. Jari' toq rat Jehová xakuy k'a ri numak y xawelesaj chuwij ri xinwejqalej.

⁶Roma ri', ri kan e awichin, xkech'on awik'in toq ek'o pa tijoj-poqonal. Wi keri' xtikiben, ri tijoj-poqonal man xtapon ta kik'in, achi'el jun raqen-ya' ri ninimer-pe y nel-pe pa ruk'ojelibal.

⁷Ja rat ri at nutobal. Kan xkinato' k'a chuwech ri bis. Kan xtaben k'a chuwe richin xkibixan roma kikoten.

⁸Ri Jehová nubij: Yin kan atintzuliben k'a. Xtink'ut k'a chawech ri bey ri k'o chi nak'uaj. Y xtinben k'a chawe richin xtiq'ax chawech.

⁹Jak'a man taben achi'el ri kiej y ri kowilej-kiej, ri kan man jun niq'ax chikiwech. Re chikopi' re' k'o chi niya'ox ch'ich' pa kichi' richin yeq'at. Y wi man niban ta keri' chike, kan man xkejel ta kik'in ri winaqi'.

¹⁰Ri e banoy etzelal kan janila q'axo'n k'o kik'in, jak'a ri kikuquban kik'u'x rik'in ri Jehová e nojineq rik'in ri rujoyowanik rija'.

¹¹Kan kenimaq'ijun y kekikot rik'in ri Jehová, ri kikuquban kik'u'x rik'in. Kebixan rik'in kikoten konojel ri choj kibanobal chuwech ri Dios.