Read Kaqchikel Sal 33 Bible Online

Sal 33 - Kaqchikel bible

Sal 33

¹Kixkikot k'a rik'in ri Jehová rix ri choj ik'aslen. Ri kibix ri kan e tz'aqet chuwech ri Dios kan jebel-wi.

²Tiya' ruq'ij ri Jehová rik'in ri arpa. Kixbixan rik'in ri q'ojom rubini'an salterio.

³Tibixaj k'a rubi' rija' rik'in k'ak'a' taq bix. Kan kixq'ojoman k'a rik'in etamabel, kixbixan rik'in kikoten.

⁴Roma ri ruch'abel ri Jehová kan choj-wi. Ronojel ri rusamaj, kan nuk'ut chiqawech, chi rija' kan nuben-wi ri nubij.

⁵Rija' kan niqa' k'a chuwech chi kan xaxe ta ri ruchojmilal nibanatej. Y re ruwach'ulew kan nojineq k'a chire ri rajowabal ri man k'isel ta.

⁶Rik'in ri ruch'abel ri Jehová xbanatej ri kaj. Xeruben k'a konojel ri xmotza' xaxe rik'in ri ruxla'.

⁷Ja rija' xmolon ruchi' ri ya' richin xuya' pa taq kik'ojelibal. Xumol ruchi' ri ya' richin xuya' pa taq yakbel-ya'.

⁸Tik'oje' k'a rukiy ri Jehová chiwech chupan chijun ri ruwach'ulew. Tiya' ruq'ij rix winaqi' ri ixk'o chuwech re ruwach'ulew.

⁹Roma kan xaxe k'a toq xubij rija' jari' toq xbanatej. Achi'el xubij rija' keri' xk'oje' kan ronojel.

¹⁰Ri Jehová kan nuben chi man jun rejqalen ri kich'obonik ri ajawaren. Rija' nuben chi nibe pa xulan ri kich'obonik ri winaqi' ri man nikitzeqelibej ta rija'.

¹¹Jak'a ri ruch'obonik ri Jehová kan keri' wi xtibanatej richin jantape'.

¹²Jebel ruwa-kiq'ij ri winaqi' chi ja ri Jehová ri ki-Dios, ri tinamit ri xucha' richin xok richin.

¹³Ri Jehová nitzu'un k'a pe k'a chikaj richin yerutz'et-pe ri winaqi'.

¹⁴Kan k'a akuchi k'o-wi rija' yerutz'et-pe. Yerutzu-pe konojel ri ek'o chuwech re ruwach'ulew.

¹⁵Ja rija' ri xbanon ri kánima, kan jak'a chuqa' rija' nitz'eton ronojel ri nikiben.

¹⁶Ri rey man ronojel ta mul yech'akon, stape' ek'o e k'iy aj-labal kik'in. Jun aj-labal man nich'akon ta xa roma janila ruchuq'a'.

¹⁷Jun wineq man ruk'amon ta nukuquba' ruk'u'x rik'in ri rukiej richin nukol-ri'. Stape' ri kiej ri' janila ruchuq'a' kan man nitikir ta nukol ri rajaw.

¹⁸Jak'a ri Jehová kan yeruchajij ri k'o rukiy ri Dios chikiwech. Yeruchajij ri nikikuquba' kik'u'x rik'in ri rajowabal ri man k'isel ta.

¹⁹Kan yerukol k'a chuwech ri kamik; kan ruya'on k'a kik'aslen, stape' k'o wayjal.

²⁰Ri qánima roj kan kuqul k'a ruk'u'x rik'in ri Jehová. Kan xaxe rija' ri nito'on qichin, y rik'in rija' niqato-wi-qi'.

²¹Roma ri' rik'in k'a rija' xtikikot ri qánima, roma kan qakuquban qak'u'x rik'in rija'.

²²Tabana' utzil Jehová, taya' ri awajowabal ri man k'isel ta pa qawi', roma roj kan qoyoben pan aq'a' rat.