Read Kaqchikel Sal 34 Bible Online

Sal 34 - Kaqchikel bible

Sal 34

¹Xtinnimirisaj k'a ruq'ij ri Jehová jantape'. Ri bix richin rija', jari' ri xtinbixaj beneq ruwech.

²Ri wánima kan xtikikot k'a rik'in ri Jehová. Re' kan xtikak'axaj k'a ri kiqasan-ki' y xkekikot.

³Tinimirisaj ruq'ij ri Jehová junan wik'in yin. Xa jun k'a qabana' richin niqaya' ruq'ij.

⁴Yin xinkanoj k'a ri Jehová, y rija' kan xirak'axaj. Xirukol k'a chuwech ronojel ri nuxibinri'il.

⁵Roma ri nikikanoj ri Jehová; kan man jun bey k'a e k'ixbitajineq.

⁶Yin ri kan in poqonatajineq xisik'in, y kan xinak'axex k'a roma ri Jehová. Y rija' kan xirelesaj k'a chupan ronojel ri tijoj-poqonal.

⁷Ri ángel richin ri Jehová, kan e ruchajin ri k'o rukiy ri Dios chikiwech, y kan yeruto'.

⁸Titejtobej y titz'eta' chi kan utz-wi ri Jehová. Jebel ruwa-ruq'ij ri wineq ri nukuquba' ruk'u'x rik'in.

⁹Tiqasaj-iwi' chuwech ri Jehová, rix ri ix ch'aron chik chire rija'. Roma ri k'o rukiy ri Dios chikiwech, man jun achike xtikajo'.

¹⁰Ri alaji' taq koj kan k'o ri nik'atzin chike, y kan yenum. Jak'a ri nikikanoj ri Jehová, kan man jun achike ta xtikajo'.

¹¹Kixanpe, alk'ualaxela', kiniwak'axaj. Xkixintijoj richin nik'oje' rukiy ri Dios chiwech.

¹²Wi rix niwajo-qa-iwi', y wi niwajo' k'iy q'ij richin yixk'ase',

¹³wi keri', tiq'ata' ri iwaq' chubixik ri etzelal. Y kan man jun bey k'a xtel q'oloj pan ichi'.

¹⁴Tijech'ej-iwi' nej chire ri etzelal, y tibana' ri utz. Tikanoj ri uxlanibel-k'u'x y jari' ri titzeqelibej.

¹⁵Ri rutzubal ri Jehová ruya'on k'a pa kiwi' ri choj kik'aslen. Y rija' nrak'axaj ri kich'owen.

¹⁶Ri Jehová kan nuteq k'a pe ri royowal pa kiwi' ri man utz ta nikiben. Rija' xtuben chi konojel winaqi' xkekimestaj re winaqi' re'.

¹⁷Ri choj kik'aslen yech'on rik'in ri Jehová y kan yerak'axaj, y kan yerukol chire ronojel ri tijoj-poqonal.

¹⁸Ri Jehová kan naqaj k'o chike ri niq'axon kánima richin nrelesaj ri q'axo'n ri'. Chuqa' kan yeruto' ri man jun chik oyobenri'il k'o kik'in.

¹⁹Ri choj kik'aslen kan k'iy-wi q'axo'n ri nikiq'axaj. Jak'a ri Jehová kan yerelesaj k'a chupan ronojel re'.

²⁰Ja ri Jehová chapayon ri kik'aslen, kan man jun k'a chike rije' ri k'o xtikik'uluwachij.

²¹Ri e banoy etzelal kan yeken k'a el roma ri kimak. Ri ye'etzelan richin ri choj kik'aslen kan xtiya'ox k'a rutojbalil chike.

²²Ri Jehová kan nukol k'a kik'aslen ri e rusamajela', y wi nikikuquba' kik'u'x rik'in rija', kan man xkebe ta pa tojbel mak.