Read Kaqchikel Sal 42 Bible Online

Sal 42 - Kaqchikel bible

Sal 42

¹Achi'el ri masat nrajo' nril jun raqen-ya' richin nuqum ruya', keri' k'a yatinkanoj rat, nu-Dios yin.

²Kan yatinkanoj k'a rat k'aslik Dios. ¿K'a janipe' kami xkitikir xkibe chupan ri awachoch richin ninya' aq'ij?

³Kan chi paq'ij chi chaq'a' k'a yinoq' chawech rat. Ri woq'ej jari' ri nuway. Jak'a ri winaqi' chaq palik nikibij chuwe: ¿Akuchi k'a k'o-wi ri a-Dios richin yaruto'?

⁴Toq noqaqa chinuk'u'x ronojel re', kan achike na k'a nuben ri wánima. Noqaqa k'a chinuk'u'x ri ojer toq in beneq kik'in ri tzobaj winaqi', y yenk'uaj k'a chupan ri awachoch. Y qonojel kan yojnimaq'ijun k'a, y ri qabix kan richin k'a kikoten y matioxinik.

⁵¿Achike roma yimayamo' yan qa? ¿Achike roma janila yibison? Yin kan nukuquban nuk'u'x rik'in ri Dios, y kan beneq ruwech xtinya' ruq'ij, roma rija' nukolonel y nu-Dios yin.

⁶Ink'o wawe' akuchi nitiker-wi-el ri raqen-ya' Jordán, pa juyu' Hermón y ri Misar. Janila yibison, y roma ri' kan janila yatinquqa' rat.

⁷Nak'axatej k'a ri ya' ri nichoxin-pe y nik'oxoman chupan ri nimalej taq siwan, ri janila chi ya' ri nateq-pe rat Jehová, kan xik'o pa nuwi' yin.

⁸Ri paq'ij ri Jehová xtuya' rutzil pa nuwi', richin keri' ri chi'aq'a', yin kan xtinbixaj ri rubi' rija', y kan yich'on k'a rik'in ri Dios ri rajaw ri nuk'aslen.

⁹Xtink'utuj chire achike roma in rumalin kan, y achike roma chaq yibison roma ri q'axo'n ri nikiben chuwe ri e etzelanel wichin.

¹⁰Ri q'axo'n ri nikiya' chuwe ri e etzelanel wichin kan k'a chupan ri nubaqil napon-wi. Ronojel q'ij nikik'utula' chuwe akuchi k'o-wi ri nu-Dios.

¹¹¿Achike roma yimayamo' yan qa? ¿Achike roma janila yibison? Yin kan ninkuquba' nuk'u'x rik'in ri Dios, y xtapon ri q'ij chi yin xtinya' chik ruq'ij. roma ja rija' nukolotajik y nu-Dios yin.