Read Kaqchikel Sal 45 Bible Online

Sal 45 - Kaqchikel bible

Sal 45

¹Kan nalex k'a pe pa wánima re utzilej bix re', y ninwajo' ninbixaj chire ri rey. Ri waq' kan achi'el k'a jun tz'ibabel richin ri más utz tz'ibanel.

²Rat rey, ja rat ri más at jebel ok chikikojol ri achi'a'; Kan jebel k'a ri ye'abij; Roma ri' ri Dios at rurtisan richin jantape'.

³Taya' k'a ri a-espada chuxe' ri apan, rat nimalej ch'akonel, rik'in ri nimalej aq'ij y ak'ojlen.

⁴Kan ta k'a xkabe pa jotol rik'in ri ak'ojlemal, kak'oje' pa ruwi' ri qitzij, ri qasanri'il y ri ruchojmilal. Y rik'in ri awijkiq'a' xtabanala' nima'q taq banobel.

⁵Ri ach'ab ri ch'ut-ch'ut rutza'n, ri kan rik'in ri' ye'ach'ek ri winaqi' ri e etzelanel awichin; kan xtuch'ik ri' pa kánima ri e etzelanel awichin rat rey.

⁶Ri awajawaren kan ja ri Dios xya'on pan aq'a' richin q'asen. Kan ja rat xkaq'aton-tzij pa ruchojmilal.

⁷Kan niqa' k'a chawech ri ruchojmilal y ri etzelal kan nawetzelaj; Roma ri' kan xarucha' ri qa-Dios, kan xarunojisaj k'a rik'in kikoten, más ke chikiwech ri awachibil.

⁸Ri atziaq kan nijubulin k'a rik'in ri ruxla' ri mirra, ri canela y ch'aqa' chik jubulej taq aq'om; k'a chupan ri awachoch ri wiqon rik'in marfíl, ri bixanela' nikiya' aq'ij rik'in q'ojom richin yakikot.

⁹Chikikojol ri winaqi' ri ek'o awik'in, kan ek'o chuqa' kimi'al taq rey. Pan awijkiq'a' pa'el-apo ri xtibe'ok reina, wiqon jebel rik'in q'anapueq ri nipe pa Ofir.

¹⁰Tawak'axaj k'a rat xten y taya' axikin chire ri xtinbenbij chawe; wakami man ja ta chik ri nikibij ri e aj pan awachoch y ri awinaq ri nanimaj.

¹¹Pa ruk'exel ri', tanimaj k'a rutzij ri awachijil. Wi keri' xtaben kan xkarajo' k'a, roma ja rija' ri awajaw.

¹²Ri xtani' ri e richin ri tinamit Tiro xkepe awik'in rik'in sipanik. Ri beyoma' richin ri tinamit kan xkepe richin xtikik'utuj utzil chawe.

¹³K'ari' nok-apo ri xtibe'ok reina, chupan ri rachoch ri rey. Ri xten ri' kan janila jebejoj ok y ri rutziaq kan wiqon k'a rupan rik'in q'anapueq.

¹⁴Y rik'in ri rutziaq ri' nuk'uex-apo rik'in ri rey, e rachibilan ri xtani' ri e tzeqetel-el chirij rija'.

¹⁵Kan rik'in k'a kikoten ye'apon chuchi' ri rachoch ri rey. Y kan ye'ok k'a apo chupan ri jay rik'in janila nimaq'ij.

¹⁶Nimalej rey: Ri awalk'ual ri xkek'oje' ja ri' ri xke'ok pa kik'exel ri ate-atata'. Re alk'ualaxela' re' kan xke'ok k'a q'atoy taq tzij pa kiwi' ri ruwach'ulew.

¹⁷Re jun bix re' kan xtuben k'a chi ri jantape' sol winaqi', kan xtikinataj ri abi'. Y kan xtikiya' k'a aq'ij konojel tinamit tibe-q'ij tibe-seq.