Read Kaqchikel Sal 48 Bible Online

Sal 48 - Kaqchikel bible

Sal 48

¹Nimalej ruq'ij ri Jehová y kan ruk'amon richin niya'ox ruq'ij jantape', chupan ri rutinamit ri k'o pa ruwi' ri juyu'.

²Ri juyu' Sión kan k'a pa jotol k'o-wi-el y jebel ok rubanon ri chiri' pa xaman. Ja rija' ri rukikoten ri ruwach'ulew, re tinamit re' kan richin ri nimalej rey,

³Ri Dios kan k'o k'a chupan ri rachoch, kan xuk'ut k'ari' chi kan ja rija' ri qato'onel.

⁴Ri q'atoy taq tzij richin ri ch'aqa' chik ruwach'ulew kan xkimol k'a ki'. Xa jun k'a xkiben richin xeyakatej chirij ri juyu' Sión.

⁵Toq rije' xkitz'et ri tinamit ri', kan xkimey k'a. Kan xsach k'a kik'u'x y xe'animej rik'in xibinri'il.

⁶Xkik'en k'a jun nimalej xibinri'il y kan xebaybot. Xkikototila-ki' roma q'axo'n achi'el nuben jun ixoq toq nik'oje' yan ti ral.

⁷Jehová, rat naben chi rik'in ri kaq'iq' ri nipe pa relebel-q'ij, ye'apaxij ri barco richin ri tinamit Tarsis,

⁸Kan achi'el k'a ri qak'axan-pe, kan keri' ri xqatz'et; keri' xqatz'et chupan ri rutinamit ri Jehová k'iytisanel richin ronojel. Chupan ri rutinamit ri qa-Dios, rija' kan xtujikiba' k'a richin jantape' ri tinamit Jerusalem.

⁹Nimalej Dios, toq ojk'o chupan ri awachoch, kan noqaqa chiqak'u'x ri ajoyowanik ri man k'isel ta.

¹⁰Kan achi'el k'a ri utzilej atzijol, keri' ri ruya'ik aq'ij chuwech chijun re ruwach'ulew. Ri awijkiq'a' xaxe ri ruchojmilal ri nuben.

¹¹Kan yekikot k'a ri winaqi' aj-Sión; kan yetzopiyaj k'a roma kikoten ri kokoj taq rutinamit, roma ri ruchojmilal ri naben.

¹²Kixbiyin y tisutij-rij ri tinamit Sión. Tiwajlaj janipe' jay kichin ri chajinela' k'o pa ruwi' ri tz'aq.

¹³Titz'eta' jebel ri rubanik ri rutz'aq. Chuqa' titz'eta' jebel ri jay richin q'atbel-tzij. Richin chi xtitzijoj chik chike ri iwijatzul

¹⁴roma kan ja Dios re' ri qa-Dios roj, tibe-q'ij tibe-seq. Ja rija' ri niyuqen qichin richin jantape'.