Read Kaqchikel Sal 5 Bible Online

Sal 5 - Kaqchikel bible

Sal 5

¹Tabana' utzil Jehová, tawak'axaj ri nuch'abel. Tatzu' k'a ri nuq'axo'n.

²Nu-rey yin y nu-Dios yin, tabana' utzil tawak'axaj ri nuk'utunik, roma awik'in rat yich'on-wi.

³Jehová, nimaq'a' yan xtawak'axaj ri nuch'abel, nimaq'a' yan xtinya' chawech ronojel ri nik'atzin chuwe y xtinwoyobej.

⁴Rat man at jun Dios ta ri niqa' chawech ri etzelal. Ri e banoy etzelal man xkek'oje' ta junan awik'in rat.

⁵Ri kinimirisan-ki' kan man xkek'oje' ta chawech rat; rat kan ye'awetzelaj k'a ri itzel taq kibanobal.

⁶Kan xke'ak'is k'a ri jantape' yetz'ukun-tzij; ri kamisanela' y ri q'olonela' kan ye'awixowaj rat Jehová.

⁷Jak'a yin, roma ri nimalej awutzil ri aya'on pa nuwi' xkinok chupan ri awachoch. Chiri' xtinya' k'a aq'ij achi'el ri ruk'amon chawe rat.

⁸Jehová, kinayuqej chupan ri ruchojmilal. Tak'utu' chinuwech ri abey, roma kan ek'o-wi ri e etzelanel wichin.

⁹Rije' man jun bey yech'on ri qitzij; kan e nojineq k'a rik'in etzelal. Kan xaxe k'a ri q'oloj ri k'o pa kichi'. Roma ri' rije' kan e achi'el k'a jun muqbel kamineq.

¹⁰Taya' k'a rutojbalil chike. Kan ta ja rije' ri xkeqaqa chupan ri pikbel ri nikiya'. Xke'awelesaj ta k'a roma janila chi mak ri nikiben, roma xa kan man xkinimaj ta ri atzij.

¹¹Xkekikot k'a konojel ri kikuquban kik'u'x awik'in; jantape' k'a xkesik'in rik'in kikoten, roma rat kan ye'ato'. Ri ye'ajowan awichin, xkekikot awik'in rat.

¹²Roma rat Jehová, nawurtisaj ri choj ruk'aslen, ri awutzil nusutij-rij achi'el jun tobel.