Read Kaqchikel Sal 51 Bible Online

Sal 51 - Kaqchikel bible

Sal 51

¹Nu-Dios yin, tabana' utzil tajoyowaj nuwech roma ri awajowabal ri man k'isel ta. Roma ri awutzil tayojo' ronojel ri numak.

²Kinach'ajch'ojirisaj chire ri itzel nubanobal. Kan kinajosq'ij chire ri numak.

³Roma yin wetaman chi kan ximakun-wi. Ri numak kan jantape' k'a k'o chinuwech ninna' yin.

⁴Kan chawech k'a rat, kan xaxe k'a chawech rat ximakun. Kan xinben k'a ri man niqa' ta chawech rat. Roma ri' kan choj ri aq'atbel-tzij ri xaya' pa nuwi'. Kan roma k'a ri numak toq naya' ruk'ayewal pa nuwi'.

⁵Yin kan in aj-mak-wi, kan ja toq xitz'ukutej-q'anej. Kan in aj-mak chik toq xiruya' chuwach'ulew ri nte'.

⁶Rat kan niqa' k'a chawech ri wineq ri kan ch'ajch'oj ri ránima. Roma ri' kinatijoj achike rubanik yibiyin rik'in na'oj.

⁷Tabana' utzil tawelesaj ri numak, richin keri' xkinok ch'ajch'oj chawech. Kinajosq'ij, richin chi ri nuk'aslen xtok más seq chuwech ri chuma-tew.

⁸Tabana' chuwe chi kan xkikikot chik. Kan ta k'a xkich'uch'u' chik chire ri q'axo'n ri aya'on chuwe.

⁹Kan man chik tatzu' ri numak. Kan tayojo' k'a ronojel ri man utz ta ri xinben.

¹⁰Nu-Dios yin, tabana' chi ri wánima kan ta ch'ajch'oj. Taya' ri rayibel wik'in, richin man yatinmalij ta kan.

¹¹Man tawelesaj-el ri Loq'olej Espíritu wik'in. Chuqa' man yinaya' kan nej.

¹²Tabana' chi xkikikot chik rik'in ri kolotajik ri naya' rat, tabana' chuwe, chi jantape' ta ch'uch'uj ri wánima.

¹³Keri' kan xtink'ut k'a chikiwech ri ch'aqa' chik aj-maki' ri abey rat. Y keri' ri winaqi' ri' kan xtitzolej k'a pe kik'u'x y kan xtikinimaj ri atzij.

¹⁴Tabana' utzil man taya' q'ij chi yin yiken, roma ja rat at nukolonel. Keri' kan xtinq'alajirisaj k'a rik'in ri nubix chi rat kan at choj-wi.

¹⁵Ajaw, tabana' chuwe chi yin yitikir yibixan, richin kan xkatinnimirisaj rik'in ri nubix.

¹⁶Rat kan man niqa' ta k'a chawech chi yin ninsuj kamelabel chawe. Man nawajo' ta chi ninporoj chikop chawech.

¹⁷Ri sipanik ri niqa' chawech, kan ja ri jun ri ruqasan-ri'. Ri nibison y ruqasan-ri' chawech, kan man nawetzelaj ta rat nimalej Dios.

¹⁸Rik'in ri awajowabal rat, kan taya' k'a ri utzil pa ruwi' ri tinamit Sión. Kan tabana' k'a chi xtiyak-el ri tz'aq chirij ri tinamit.

¹⁹K'ari' xtak'awomaj ri sipanik ri xkeya'ox chawe rat pa ruchojmilal; Y xtiqaben pa ruchojmilal ri sipanik ri yeporox jumul, k'ari' xtiporox ri nima-alaj achij wákix pa ruwi' ri porobel chawech rat.