Read Kaqchikel Sal 52 Bible Online

Sal 52 - Kaqchikel bible

Sal 52

¹Rat ri nim aq'ij banon chawe, ¿achike roma nanimirisaj-awi' rik'in ri itzel taq abanobal? Ri rujoyowanik ri Dios pa kiwi' ri ralk'ual, kan richin jantape'.

²Rat kan xaxe k'a ri itzel taq banobel ri nach'obola' chijun q'ij. Ri awaq' kan xaxe k'a q'oloj ri nuben, kan achi'el jun qupibel ri ya-ya' rey.

³Xa kan más k'a niqa' chawech ri etzelal chuwech ri ruchojmilal. ja ri tz'ukuj-tzij nawajo' pa ruk'exel ri qitzij.

⁴Xa ja ri itzel taq ch'abel ri niqa' chawech, ri awaq' xa kan q'olonel.

⁵Roma ri' ri Dios kan xkaruk'is jumul. Xkaruchop k'a y xkarelesaj-el chupan ri awachoch. Y kan xtrelesaj k'a el ri ak'aslen.

⁶Re' kan xtikitz'et k'a ri choj kik'aslen y xtikik'en rukiy ri Dios. Xketze'en k'a chawij rat y xtikibij:

⁷Titzu' ri xuk'uluwachij ri wineq ri man xukuquba' ta ruk'u'x rik'in ri Dios. Xa kan rik'in k'a ri rubeyomel ri xukuquba-wi ruk'u'x. y jantape' xk'oje' chupan ri rumak.

⁸Jak'a yin ink'o chupan ri rachoch ri Dios, achi'el jun ruche'el olivo ri rex-rex rubanon, roma yin, rik'in k'a ri rujoyowanik ri Dios nukuquban-wi nuk'u'x jantape'.

⁹Nimalej Dios, yin kan xtinya' k'a aq'ij jantape' roma keri' abanon chuwe. Kan xtinkuquba' nuk'u'x awik'in rat. Y roma ri' xtinya' aq'ij chikiwech ri winaqi' ri yatkitzeqelibej, roma kan jari' ri ruk'amon richin ninben.