Read Kaqchikel Sal 60 Bible Online

Sal 60 - Kaqchikel bible

Sal 60

¹Nimalej Dios, rat xojaya' kan y xojawulaj k'a kan; Yakatejineq awoyowal chiqij; ¡tabana' utzil katzolin-pe qik'in, wakami!

²Kan xaben chi xsilon ri ruwach'ulew y xaben chire chi xjobojo-qa; Tabana' utzil tachojmirisaj chik ri xwopotej-qa, roma beneq ruwech nisilon.

³Xaben k'a chiqe roj ri atinamit chi xqatz'et ri nima'q taq ruk'ayewal; Xaben chiqe chi achi'el xa ta xqaqum k'iy vino richin xojq'aber.

⁴Jak'a rat kan xatzeqej k'a ri tzieq richin retal chike ri nikiya' aq'ij, richin ye'animej chikiwech ri e etzelanel kichin.

⁵Tabana' utzil, kan ke'akolo' k'a ri kan e wajowan-pe, ke'akolo' k'a rik'in ri awuchuq'a' y kan tawak'axaj ri nuch'owen.

⁶Ri Dios kan kere' k'a rubin chupan ri rachoch: Yin kan xkikikot; xtinch'er k'a ri ruwach'ulew Siquem, kan xtinwetaj k'a ri taq'aj kojol juyu' richin Sucot.

⁷Ri ruwach'ulew Galaad y ri Manasés kan e wichin yin. ri ruwach'ulew ri k'o pa xaman kan achi'el jun tobel richin jolomaj chuwe yin, y ri Judá ri k'o pa xokon, kan jari' ri nuya'on richin nuq'et-tzij.

⁸Ri Moab xa kan achi'el k'a jun ruk'ojelibal-ya' richin ninch'ej waqen. Ri Edom kan pa ruwi' rija' xtinya-wi ri nuxajab, y kan xkikikot k'a chirij ri ruwach'ulew Filistea toq xtich'akatej, xcha' ri Dios.

⁹¿Achike ta k'a xqojuk'uan chupan ri tinamit ri sutin-rij chi tz'aq? ¿Achike ta k'a xqojuk'uan k'a pan Edom?

¹⁰¿Man ja ta kami rat Jehová ri xa oj amalin kan, y man at beneq ta chik qik'in toq yojbe pa labal?

¹¹Wakami k'a, tabana' utzil, qojato' pa kiq'a' ri e etzelanel qichin, roma ri kito'onik ri achi'a' xa kan man jun rejqalen.

¹²Wi rat qa-Dios atk'o qik'in, roj kan xtiqaben k'a nima'q taq banobel, Rat xke'axeq' k'a ri e etzelanel qichin.