Read Kaqchikel Sal 66 Bible Online

Sal 66 - Kaqchikel bible

Sal 66

¹Chi'iwonojel rix winaqi', tinimirisaj rubi' ri Jehová rik'in kikoten.

²Tibixaj ri ruk'ojlen ri rubi'; kan tinimirisaj k'a ri rubi' rik'in bix.

³Kan kere' k'a tibixaj chire ri Dios: ¡Janila k'a e meyel ri abanobal! Roma ri runimirinen ri awuchuq'a', nikiqasaj-ki' chawech ri e etzelanel awichin.

⁴Konojel k'a winaqi' richin re ruwach'ulew nikiya' aq'ij. Kan yebixan k'a chawe rat y ja ri abi' ri nikibixaj, kixcha' chire.

⁵Kixanpe k'a, titz'eta' ronojel ri rubanon ri Dios, ri meyel taq banobel ri xuben kik'in ri qate-qatata'.

⁶Xuben chi ri Kaqa-Palou, xchaqer, y kan chikaqen k'a xeq'ax-el chupan. Kixanpe k'a, qojkikot rik'in ri Dios.

⁷Rija' rik'in uchuq'a' niq'aton-tzij richin jantape'; kan e rutzuliben k'a konojel ri winaqi' richin ri ruwach'ulew, ri nikipaba-ki' chuwech, kan man xtuya' ta q'ij chike chi xkebe pa jotol.

⁸Chi'iwonojel k'a rix winaqi' tinimirisaj rubi' ri Dios. Kan tak'axex k'a ri ich'abel richin ri ibix.

⁹Ja rija' ri yoyon qak'aslen, y kan nuben k'a chiqe richin man yojilijo' ta.

¹⁰Qa-Dios roj, ronojel re' xaben richin xojatejtobej; xojach'ajch'ojirisaj achi'el toq nijosq'ix ri saqipueq.

¹¹Xaya' k'a q'ij chi xojqaqa chupan jun pikbel; xaya' k'a jun nimalej ejqa'n pa qawi'.

¹²Xaben chiqe chi ri e etzelanel qichin xojkixeq'. Kan xaben k'a chiqe chi achi'el xa ta xojq'ax pa q'aq' y pa ya', chirij k'a ronojel re' xaya' uxlanen pa ruk'iyal chiqe.

¹³Yin kan xkinok k'a chupan ri awachoch, kan xtinporoj k'a chikop chawech, y xtinya' k'a apo ri nusujun chawe.

¹⁴Ronojel ri xinsuj toq xik'oje' pa q'axo'n, kan jari' ri xtinya-apo chawe.

¹⁵Kan xtinporoj k'a chawech ri taq chikopi' ri más e ti'oj, xtinsuj richin kamelabel ri achija' taq karne'l, ri bóyix y achija' taq tzuntzun.

¹⁶Kixanpe k'a, tiwak'axaj rix ri k'o rukiy ri Dios chiwech, y xtintzijoj chiwe ronojel ri rubanon pa nuk'aslen.

¹⁷Yin kan xich'on rik'in rija', y xinnimirisaj k'a ri rubi'.

¹⁸Wi ta yin k'o mak pa nuk'aslen, ri Dios man ta xirak'axaj.

¹⁹Jak'a man keri' ta; roma ri Dios kan xirak'axaj-wi; kan xrak'axaj k'a ri nuch'owen.

²⁰Kan tinimirisex k'a rubi' ri Dios, roma kan man xuya' ta kan chaq keri' ri nuch'owen, xa kan xujoyowaj k'a nuwech.