Read Kaqchikel Sal 7 Bible Online

Sal 7 - Kaqchikel bible

Sal 7

¹Jehová nu-Dios, awik'in rat nukuquban nuk'u'x. Kinakolo' k'a pa kiq'a' ri e yakatajineq chuwij.

²Roma rik'in juba' nikelesaj ri nuk'aslen y xkinkiwech' achi'el nuben jun koj, y kan man jun xkikolon pa kiq'a'.

³Jehová nu-Dios yin, wi ta yin k'o ri man utz ta ri nubanon, wi k'o ta itzel taq banobel nubanon,

⁴wi ta xinya' rutojbalil chire ri xa man jun rubanon chuwe, wi ta yin kan k'o xinmej chuwi-ruq'a' ri etzelanel wichin, toq man ojk'o ta pan oyowal.

⁵Wi ta keri' nubanon, kan kinkitzeqelibej k'a ri e etzelanel wichin, y kan kinkiq'i' k'a. Kinkikamisaj y kinkitorij kan pan ulew.

⁶¡Jehová, kayakatej k'a chi nuto'ik! kan rik'in k'a awoyowal, kayakatej chikij ri e etzelanel wichin. Rat kan abin chi kan naya-wi rutojbalil, kan kinato' k'a wakami.

⁷Tikimolo' k'a ki' ri tinamit, richin k'a chila' chikaj xkaq'aton-pe tzij pa kiwi'.

⁸Jehová ja rat ri yaq'aton-tzij pa kiwi' ri winaqi'. Taq'ata' k'a tzij chuqa' pa nuwi' yin, achi'el ri ruchojmilal ri nuk'aslen.

⁹Tik'is k'a wakami ri ketzelal ri aj-maki' y takolo' ri choj ruk'aslen, roma rat at jun Dios choj, y kan nanik'oj ri ránima y ri ruch'obonik ri wineq.

¹⁰Ri nutobal yin, kan ja ri Dios, ri Dios ri nikolon kichin ri choj yebiyin.

¹¹Ri Dios kan jun choj q'atoy-tzij, rija' jantape' nrixowaj ri mak.

¹²Wi ri aj-mak man nutzolij ta ri' chirij, ri Dios kan xtuben rey ri ru-espada; kan xtuya' k'a chuwi-rutele'n ri rute-ch'ab, y kan xtuq'ijuj k'a rik'in.

¹³Kan e runaban chik ri rukamisabal, y kan e ruya'on chik q'aq' pa rutza'n ri ruch'ab.

¹⁴Ri aj-mak kan xaxe k'a q'axo'n ri nutik, y pa ruk'isibel nibeq'alajin-pe ronojel ri q'oloj yeruben.

¹⁵Nuk'ot k'a jun jul y janila nim rupan nuben chire; jak'a ri jul ri xuben xa chupan k'ari' xtitzaq-wi.

¹⁶Ri rumak xa pa ruwi' k'a rija' xtiqaqa-wi; kan pa ruwi' k'a rija' xtapon-wi ri itzel taq rubanobal.

¹⁷Jak'a yin kan xtinya' ruq'ij ri Jehová, roma rija' kan pa ruchojmilal nuq'et-tzij, Kan xtinbixaj k'a ri rubi' ri nimalej Jehová.