Read Kaqchikel Sal 72 Bible Online

Sal 72 - Kaqchikel bible

Sal 72

¹Nimalej Dios, tak'utu' ri apixa' chuwech ri rey. Kan tabana' chire chi xtuben ri ruchojmilal ri nawajo' rat,

²richin rija' xtiq'aton-tzij pa ruwi' ri tinamit, y richin xtuya' ruchojmilal pa kiwi' ri yetz'ilox.

³Y roma ri pa ruchojmilal niq'aton-tzij, ri winaqi' nikil uxlanibel-k'u'x y ruchojmilal ri pa ruwi' taq juyu'.

⁴Xtuq'et k'a tzij pa kiwi' ri e k'ayewatajineq. Xkerukol k'a kalk'ual ri man jun k'o kik'in. Jak'a ri xetz'ilon kichin, rat xke'aya' pa ruk'ayewal.

⁵Ri rajawaren xtik'oje' jantape', junan rik'in ri ik' y ri q'ij, xtik'oje' k'a, stape' xkeq'ax k'iy sol winaqi'.

⁶Ri ruq'atoj-tzij ri rey kan achi'el k'a ri job pa ruwi' ri q'ayis, achi'el chuqa' ri raxq'ab ri niqaqa-pe pa ruwi' ri ruwach'ulew.

⁷Chupan ri q'ij toq xtiq'aton-tzij rija', kan xtikotz'ijan k'a ri ruchojmilal. Kan xtik'oje' k'a janila uxlanibel-k'u'x. Kan keri' k'a xtuben tibe-q'ij tibe-seq.

⁸Ri rajawaren xtitikir k'a el chuchi' ri palou y napon k'a ri juk'an chik ruchi', xtitiker-el chuchi' ri raqen-ya' Éufrates y xtapon k'a chuchi' chijun ri ruwach'ulew.

⁹Chuwech rija' xkexuke-wi ri e etzelanel richin ri ek'o pa tz'iran ruwach'ulew, rije' kan xkech'akatej k'a roma rija'.

¹⁰Ri e rey richin ri ruwach'ulew Tarsis y ri ek'o pa taq'aj, xtikik'en-pe sipanik chire; keri' chuqa' ri e rey richin ri ruwach'ulew Sabá y ri e richin Sebá.

¹¹Konojel k'a ri rey richin chijun ruwach'ulew xkexuke' chuwech rija', y konojel tzobaj winaqi' richin re ruwach'ulew xtikisamajij rija'.

¹²Rija' xtikolon kichin ri k'o nik'atzin chike, toq rije' xtikik'utuj to'onik, xkeruto' chuqa' ri e k'ayewatajineq y man jun nito'on kichin.

¹³Kan xtujoyowaj k'a kiwech ri man jun ok k'o kik'in, y ri k'o nik'atzin chike, y kan xtukol kik'aslen re winaqi' re'.

¹⁴Xtukol k'a ri kik'aslen pa kiq'a' ri q'olonela' y ri kamisanela', roma ri kikik'el rije', kan janila k'a nupoqonaj rija'.

¹⁵¡Tik'ase' k'a ri rey y tiya'ox chire ronojel ri q'anapueq ri nipe pa Sabá! Jantape' k'a tiban ch'owen pa ruwi' rija'; beneq k'a ruwech tinimirisex ri ruq'ij.

¹⁶Kan pa ruk'iyal k'a ri ixin ri xtiwachin chiri'; kan ta k'a k'iy ri tiko'n xtiwachin pa ruwi' ri juyu'. Kan ta achi'el kibanon ri che' chuwech ri Líbano, y kan ta achi'el nik'iy-pe ri q'ayis, xtik'iy-pe ri trigo.

¹⁷Ri rubi' ri rey xtik'oje' jantape'; ri utzilej rutzijol kan man xtik'is ta, achi'el ri q'ij man nik'is ta. Konojel tzobaj winaqi' richin re ruwach'ulew xtikik'ul urtisanik pa ruq'a' rija', konojel xtikibij chi rija' kan jebel ruwa-ruq'ij.

¹⁸¡Kan nim k'a ruq'ij ri Jehová Dios, ri Dios richin Israel! Kan xaxe rija' ri nibanon ri meyel taq banobel.

¹⁹¡Kan tinimirisex k'a ri nimalej rubi' jantape'! Kan chijun ta ri ruwach'ulew xtinoj rik'in ri ruk'ojlemal, ¡Kan keri' ta k'a xtibanatej, ja' kan keri'!

²⁰Wawe' nitane-wi chire ri ruch'owen rik'in ri Dios, ri David ri ruk'ajol kan ri Isaí.