Read Kaqchikel Sal 73 Bible Online

Sal 73 - Kaqchikel bible

Sal 73

¹Kan qitzij wi chi ri Dios kan janila utz rik'in ri rutinamit Israel, kik'in ri ch'ajch'oj kánima chuwech rija'.

²Jak'a yin, kan jubama xitzaq; xa rik'in ta chik juba' xijilijo' ta,

³roma yin kan xch'upun nuk'u'x chikij ri nima'q nikina-ki', itzel xinna' toq xintz'et chi e beneq pa jotol ri maneq Dios chikiwech.

⁴Roma rije' kan man jun nikimey richin yeken; y kan k'a janila jebel kuchuq'a'.

⁵Man jun bey k'a yejitz'atej pa samaj achi'el ri ch'aqa' chik winaqi', Y man jun k'a ruk'ayewal nikiq'axaj.

⁶Roma ri' ri nimirisanen ri k'o kik'in, kan achi'el jun wiqobel kibanon chire, ri kamik ri nikiben, kan yekikot rik'in.

⁷Ri runaq' taq kiwech kan achi'el ye'el-pe roma kitiojil; ronojel ri nurayij ri kánima kan nikil.

⁸Kan xaxe k'a yetze'en y ruyon etzelal ri nikibij ri kich'owen kan ruyon rik'in nimirisanen.

⁹Nikiyoq'-q'anej ri Dios ri k'o chikaj, nikitzijola' ri nikiben chuwech re ruwach'ulew.

¹⁰Y kan ek'o k'a chuqa' winaqi' ri choj kik'aslen ri yebe kik'in; kan junan k'a nikiben kik'in rije'.

¹¹Kan nikibij k'a chi ri Dios man nretamaj ta ri nikiben rije', y chi man jun bey xtunabej.

¹²Ri winaqi' ri janila e itzel kan man jun k'a q'axo'n nikiq'axaj, y kan janila k'a chi beyomel nikil.

¹³Jari' k'a toq xinbij-qa chi xa man jun nik'atzin-wi chi ch'ajch'oj ri wánima, ni ri nuchajin-wi' richin man ninben ta ri etzelal.

¹⁴Roma xa kan jantape' ninwil q'axo'n, kan ronojel k'a q'ij nink'ul ruk'ayewal.

¹⁵Xa ta yin ninbij-qa, más utz kich'on na achi'el yech'on rije', y wi ta keri', xa xenq'ol ta ri kikuquban kik'u'x rik'in ri Dios.

¹⁶Toq xinch'ob richin keri' ninben, kan janila k'ayew xinna'.

¹⁷K'a ja toq xinok chupan ri rachoch ri Dios, k'a chiri' k'a xq'ax chinuwech ri akuchi ye'apon-wi rije'.

¹⁸Kan qitzij na wi chi rat Jehová kan e aya'on k'a re itzel taq winaqi' re' chuwa-liq'. Xa xtaben k'a chike chi xkebetzaq y xkek'is chiri'.

¹⁹Pa jun ramaj k'a xkewuluwu', y roma ri kixibinri'il xke'apon pa kamik.

²⁰Ri itzel taq winaqi' e achi'el jun achik' ri nimestex toq niseqer-pe; keri' xtaben chike rat ajaw, toq xkayakatej, rat xa xke'awixowaj roma ri kibanobal.

²¹Toq yin kere' xinch'ob, kan janila k'a xik'oje' pa k'ayew, y ri wánima kan janila k'a xq'axon.

²²Kan janila k'a in nakanik, roma kan man niq'ax ta k'a chinuwech; y kan in achi'el k'a jun chikop chawech rat.

²³Man rik'in ri', yin kan jantape' k'a nukuquban-pe nuk'u'x awik'in rat, y kan in ayuqen k'a.

²⁴Kan in atijon k'a rik'in ri apixabanik. Xeri' kan xkinak'ul chupan ri aruwaq'ijaj.

²⁵¿Achike ta chik k'a xtinrayij yin chire ri k'o chila' chikaj? ¡Kan xaxe k'a rat ri yatinwajo'! ¿Achike ta chik k'a xtinwajo' yin wawe' chuwech re ruwach'ulew? ¡Kan xaxe k'a rat ri yatinwajo'!

²⁶Ri nuch'akul y ri wánima xa nik'is-qa kuchuq'a', jak'a rat Jehová naya' wuchuq'a' y jantape' k'a naya' ri nik'atzin chuwe.

²⁷Ri at kimalin kan xa kan xkeken k'a; rat xtaben chi xkek'is-el konojel ri nikich'er kan ki' awik'in.

²⁸Jak'a yin kan más k'a utz nuben chuwe chi yijel-apo awik'in rat nu-Dios. Kan awik'in rat Jehová nukuquban nuk'u'x. Y xtintzijoj ronojel ri abanon.