Read Kaqchikel Sal 79 Bible Online

Sal 79 - Kaqchikel bible

Sal 79

¹Nimalej Dios, ri winaqi' ri man yatkitzeqelibej ta xepe wawe' chupan re aruwach'ulew. Xepe y xkiqasaj ruq'ij ri awachoch. Y kan xkiwulaj kan jumul ri tinamit Jerusalem.

²Ri kich'akul ri asamajela' xkiya' chikiwech ri aj-xik' taq chikopi' richin xok kiway. Kan chikiwech k'a ri k'uxunela' taq chikopi' xkiya-wi ri kich'akul rije'.

³Xkiben k'a chi ri kikik'el xbiyin chuchi' ri Jerusalem, achi'el nibiyin ri ya', y kan man jun chik k'a ri xmuqun ta kichin.

⁴Kan yojkiyojobej ri ek'o chiqanaqaj. Ri ch'aqa' chik ruwach'ulew yetze'en chiqij.

⁵Jehová, ¿kan jantape' ta k'a xtik'oje' ri awoyowal pa qawi'? ¿K'a janipe' xtitane' ri awoyowal richin nik'a'on achi'el nuben ri q'aq'?

⁶Taya' k'a ri awoyowal pa kiwi' ri winaqi' ri man yatkitzeqelibej ta, pa kiwi' ri ruwach'ulew ri man yatkinataj ta.

⁷Roma rije' kan xekik'is k'a ri qawinaq israelita, y kan xekiwulaj kan ri kachoch.

⁸Man tanataj pa qawi' roj ri itzel taq kibanobal ri qati't-qamama'. Tabana' utzil taya-pe chi'anin ri ajoyowanik pa qawi', roma roj kan man niqakoch' ta chik re niqak'owisaj.

⁹Nimalej Dios ri at qakolotajik roj. Tabana' utzil qojato' roma ri ruk'ojlemal ri abi'. Qojakolo' y takuyu' ri qamak roma ri nimalej abi'.

¹⁰Roma ri winaqi' ri man yatkitzeqelibej ta nikibij-pe: ¿Akuchi k'a k'o-wi ri i-Dios?, yecha'. Niqajo' chi rat naya' ruk'ayewal pa kiwi' ri winaqi' ri', roma xkiben chi xbiyin kikik'el ri qawinaq ri e asamajela'.

¹¹Tabana' utzil tawak'axaj ri kijiloj ri ek'o pa ximonri'il. Rik'in ri nimalej awuchuq'a', ke'ato' richin man ye'apon ta pa kamik.

¹²Nimalej Jehová, taya' pa kiwi' ri winaqi' ri ek'o chiqanaqaj wuqu' mul rutojbalil. Taya' rutojbalil roma xatkiyojobej.

¹³K'ari' roj, ri oj atinamit rat, ri oj achi'el akarne'l richin ri aqejoj, kan jantape' k'a xtiqaya' aq'ij. Y chi wiq chi tanaj xtiqanimirisaj ri aq'ij.