Read Kaqchikel Sal 81 Bible Online

Sal 81 - Kaqchikel bible

Sal 81

¹Tiqabixaj rik'in kikoten ri rubi' ri Dios, ri qatobal roj; kan rik'in kikoten tiqanimirisaj ruq'ij ri ru-Dios ri Jacob.

²Qojbixan rik'in ri pandero, qojbixan rik'in ri arpa y ri salterio.

³Toq nalex ri ik', kan tixupux k'a ri trompeta, richin nitikeribex ri nimaq'ij, keri' chuqa' tiban toq ri ik' seton-seton rubanon.

⁴Roma re' kan jare' ri pixa' ri ya'on chike ri qati't-qamama'. Jare' ri ruq'aton kan ri qa-Dios pa qawi'.

⁵Jare' ri xuya' chike ri qati't-qamama', toq rija' xyakatej chikij ri aj-Egipto. Xak'axatej k'a jun rutzijol ri man jun bey ak'axan, y kere' xubij:

⁶Yin xinelesan chiwij ri ejqa'n ri ik'uan, ri iq'a' kan xe'uxlan k'a chuk'uaxik ri al taq ejqa'n.

⁷Chupan ri tijoj-poqonal xiniwoyoj, y yin kan xixinto'; Xink'uluba' k'a ri ich'abel rik'in koqolajay; K'ari' xixintejtobej k'a chunaqaj ri ya' richin Meribá.

⁸Tiwak'axaj k'a nutinamit yin, y xtink'ut chiwech ri utz chi niben. K'ate' ta, kan niwak'axaj ri nuch'abel.

⁹Man k'a kek'oje' chi'ikojol rix ch'aqa' chik dios, ni man k'a kixxuke' chikiwech rije'.

¹⁰Kan xaxe k'a yin Jehová, ri in i-Dios, y ja yin ri xinelesan-pe iwichin chupan ri ruwach'ulew Egipto. Tik'utuj k'a chuwe ri nik'atzin chiwe y yin kan xtinya', xicha' chike ri iwati't-imama'.

¹¹Jak'a rije' xa man xkajo' ta xinkak'axaj, ri nutinamit Israel xa man xrajo' ta xunimaj nutzij.

¹²Roma ri' xenya' kan rik'in ri rukowirinen ri kánima; y xebiyin k'a achi'el ri xkajo' rije'.

¹³¡K'ate' ta xinkak'axaj ri tinamit Israel! ¡k'ate' ta xkitzeqelibej ri bey wichin yin!

¹⁴Xa ta keri', yin kan pa jun ramaj ta xentzeq ri e etzelanel kichin, kan xintzeqej ta ri nuq'a' chikij ri xeya'on pa k'ayew rije'.

¹⁵Keri', ri winaqi' ri yinketzelaj yin Jehová, kan ta xkiqasaj-ki' chikiwech rije'; ri rutojbalil-mak pa kiwi' ri winaqi' ri' kan ta richin q'asen.

¹⁶Jak'a ri nutinamit yin, kan ta xinya' ri jebelej trigo chike; kan ta rik'in kab ri nikiya' ri taq chikopi' xink'owisaj ri chaqi'j kichi', xcha'.