Read Kaqchikel Sal 83 Bible Online

Sal 83 - Kaqchikel bible

Sal 83

¹Nimalej Dios ¿Achike roma man jun nabij? ¡Man taben chi man jun nabij, ni man kak'oje' kan choj keri'!

²Ri e etzelanel awichin kan yeken k'a roma koyowal. Ri itzel nikina' chawe kan kipaban k'a ki'.

³Kan xkiya' k'a chikiwech chi xeyakatej chiqij roj ri oj atinamit; pan ewel k'a xkich'ob rij ri etzelal ri nibekibana' chiqe roj ri kan oj achajin rat.

⁴Xkich'ob k'a chi yeyakatej chiqij roj israelita, richin yojkik'is; kan nikajo' k'a nikiyoj jumul ri rubi' re qaruwach'ulew.

⁵Kan jun k'a kiwech kibanon chire re ch'obonik re'. Kan xkiyala' k'a kitzij chi yeyakatej chawij.

⁶Re winaqi' re' je ri edomita, ri ismaelita, ri moabita, ri agareno,

⁷ri guebalita, ri amonita, ri amalecita, ri aj-Filistea y ri aj-Tiro.

⁸Keri' chuqa' ri winaqi' aj-Asiria kan xkitun chuqa' ki' kik'in konojel re winaqi' re'; kan xkisuj-ki' richin yekito' ri amonita y ri moabita.

⁹Nimalej Dios, tabana' chike re winaqi' re', achi'el xaben chike ri aj-Madián, achi'el xaben chire ri Sísara, y chire ri Jabin chiri' chuchi' ri raqen ya' Quisón,

¹⁰ri xeken kan chupan ri ruwach'ulew Endor, ri xa xepunupuxin kan, y xeq'ey chiri'.

¹¹Tabana' kik'in rije' achi'el xaben chike ri Oreb y ri Zeeb, tata'al kichin ri aj-Madián; achi'el xaben chike ri Zébah y Salmuná, ri e rey richin Madián,

¹²ri xkibij chi nikichop kan ri ruwach'ulew ri kan awichin rat.

¹³Qa-Dios roj, tabana' chike rije' chi xketalutej-el, achi'el nuben ri surkum chire ri ruxaq taq che'. achi'el ri solot ri xa nuk'uaj-el ri kaq'iq'.

¹⁴Kan ke'atzeqelibej k'a rik'in ri awuchuq'a', achi'el ri q'aq' ri nijote-q'anej chi'anin pa jun juyu'. Tabana' chi nisach kik'u'x, achi'el toq ri q'aq' nibe-q'anej chi'anin chuwa taq juyu'.

¹⁶Nimalej Jehová, kan ke'ak'ixbisaj k'a re winaqi' re', richin keri' kan xkatkikanoj k'a rat.

¹⁷Ke'ak'ixbisaj y tasacha' kik'u'x richin q'asen, richin yeken pa jun ruk'ayewal.

¹⁸Tabana' ronojel re' richin niketamaj, chi ri abi' rat, Jehová, y chi kan xaxe rat yaq'aton-tzij pa ruwi' ri ruwach'ulew.