Read Kaqchikel Sal 85 Bible Online

Sal 85 - Kaqchikel bible

Sal 85

¹Nimalej Jehová, rat kan xajoyowaj chik ruwech re qaruwach'ulew. Xaben k'a chi xel-pe chupan ri ximonri'il.

²Kan xakuy k'a qamak; ronojel k'a ri mak ri xeqabanala' kan xatz'apej ruwi'.

³Kan xch'uch'u' k'a qa ri awoyowal; y xatane' k'a chi relesaxik ri awoyowal chiqij.

⁴Qa-Dios y qakolonel roj, tabana' utzil qojakolo' chik wakami, y taq'ata' ri awoyowal ri aya'on pa qawi'.

⁵¿Kan xtibe kami ruwech ri awoyowal pa qawi' roj? ¿Kan xtanimirisaj kami ri awoyowal chikij ri chi sol chi sol winaqi'?

⁶¿Kan man naya' ta chik kami ri qak'aslen, richin chi roj ri oj atinamit yojkikot chik awik'in?

⁷Nimalej Jehová, tak'utu' k'a chiqawech ri ajoyowanik ri man k'isel ta, kan taya' k'a ri kolotajik chiqe.

⁸Yin kan xtinwak'axaj k'a ri xtubij ri Jehová Dios, roma kan nusuj uxlanen chiqe roj ri oj rutinamit y chike ri kan kich'aron-ki' chire rija', richin chi man yetzolej ta chik kan chupan ri etzelal.

⁹Kan qitzij na wi chi ri Jehová kan naqaj k'o-wi chike ri k'o rukiy rija' chikiwech; kan yeruto' richin chi ri ruk'ojlemal jantape' k'o chupan ri qaruwach'ulew.

¹⁰Rija' janila yojrajo' y kan nuben qik'in ri rusujun chiqe. Nuben ri ruchojmilal qik'in, y kan nuya' uxlanen pa qánima.

¹¹Y roj, pa ruk'exel niqamalij kan ri qa-Dios, xa más yojel-q'anej rik'in. Y rija' yojrutzu-pe rik'in ruchojmilal.

¹²Ri Jehová kan xtuya' k'a ri urtisanik pa qawi', y ri qaruwach'ulew kan xtiwachin k'a.

¹³Rija' nuteq-pe nabey ri ruchojmilal, y nuya' jun retal richin roj niqatzeqelibej.