Read Kaqchikel Sal 86 Bible Online

Sal 86 - Kaqchikel bible

Sal 86

¹Jehová, tabana' utzil taya' axikin chuwe y kinawak'axaj, yin kan in poqonatajineq, y k'o k'atzinel chuwe.

²Tabana' chuwe chi man jani yiken, roma yin kan man at numalin ta kan. Kinakolo' k'a roma nukuquban nuk'u'x awik'in.

³Tajoyowaj nuwech yin, nimalej Jehová, roma yin kan chijun q'ij k'a yatinwoyoj.

⁴Tabana' chi yikikot yin ri in asamajel, y ri nuch'owen kan choj ta nibe-q'anej awik'in rat.

⁵Roma rat ajaw kan janila at utz y at kuyunel, ri awajowabal man jun bey nik'is kik'in ri yekanon awichin.

⁶Nimalej Jehová, tabana' utzil tawak'axaj ri nuch'owen, kan tik'oje' chi'ak'u'x ri nuk'utunik ri ninben chawe.

⁷Chupan ri q'ij richin q'axo'n, kan yich'on awik'in, roma wetaman chi rat kan nak'uluba-pe ri nuch'abel.

⁸Nimalej ajaw, ¡kan man jun chik k'a k'o achi'el rat chikikojol ri ch'aqa' chik dios! Ri asamaj rat kan man jun chik achoq ik'in ta xtijunamex-wi.

⁹Konojel tzobaj winaqi' ri xe'aben, xkepe chawech y xtikiya' aq'ij rat ajaw. ¡Kan xtikinimirisaj k'a ri abi'!

¹⁰Roma rat kan janila at nim, y kan ye'abanala' nima'q taq banobel. ¡Kan xaxe rat ri at Dios!

¹¹Nimalej Jehová, tabana' utzil tak'utu' chinuwech ri abey, y yin kan man xtinmalij ta kan ri bey ri'; tajikiba' ri wánima richin chi nik'oje' akiy chinuwech.

¹²Kan rik'in ronojel wánima xtinbixaj ri abi' Jehová, nu-Dios yin. Kan xtinnimirisaj k'a aq'ij tibe-q'ij tibe-seq.

¹³Roma ri ajoyowanik rat kan janila nim pa nuwi' yin, kan in akolon chuwech ri muqbel kamineq.

¹⁴Ri winaqi' ri kan janila e nima'q nikina-ki' kan e yakatajineq k'a chuwij, ri e itzel taq winaqi' kan kiya'on k'a chikiwech chi yinkikamisaj; rije' kan man yatkik'ulubej ta rat chire ri nikiben.

¹⁵Jak'a rat ajaw kan at Dios joyowanel y koch'onel, man chi'anin ta k'a nipe awoyowal y ri awajowabal kan man jun bey xtik'is y rat man jun bey yojamalij kan.

¹⁶Kinatzu' y tajoyowaj nuwech, taya' wuchuq'a' y kinakolo' yin ri in asamajel; yin ri in ral kan ri xok chuqa' asamajel.

¹⁷Taya' k'a jun retal ri awutzil pa nuwi', tikitz'eta' ri e etzelanel wichin y kek'ixbitej, roma rat Jehová kan xinato' y xakuquba' nuk'u'x.