Read Kaqchikel Sal 88 Bible Online

Sal 88 - Kaqchikel bible

Sal 88

¹Nimalej Jehová, ja rat ri at nukolonel, chi paq'ij chi chaq'a' yisik'in awik'in richin yinato'.

²¡Kan ta xtapon ri nuch'owen chawech rat! ¡tabana' utzil taya' axikin chire ri nuch'abel!

³Roma yin kan xik'o yan nuk'u'x chire re q'axo'n re ninq'axaj, ri nuk'aslen xa kan naqaj chik k'o chire ri kamik.

⁴Yin xa kan ruk'amon chik chi yinajilex chikikojol ri kaminaqi'. Xa kan in lawalik chik k'a jumul.

⁵Ninna' yin chi kan achi'el in malin chik kan chikikojol ri kaminaqi', achi'el ri xekamisex rik'in espada, ri ek'o chik pa jul muqbel kamineq. In achi'el ri kan man ye'oqaqa ta chik chi'ak'u'x, y xe'elesex yan el pan aq'a'.

⁶In aya'on k'a chupan jun jul ri kan janila nej qajineq, chupan q'equ'm ri kan nej beneq-wi.

⁷Ri awoyowal kan janila nim qajineq pa nuwi', yin kan maneq chik k'a wuchuq'a' roma ri awoyowal.

⁸Kan xe'ajech'ej k'a el chuwe yin ri winaqi' ri más ketaman nuwech; xaben k'a chuwe chi itzel chik yinkitz'et; wakami kan in tz'apel k'a pa jay, y man yitikir ta yinel-el.

⁹Ri runaq'-nuwech kan xeq'equmatej yan k'a roma ri q'axo'n. Kan ronojel k'a q'ij at woyon, nimalej Jehová; kan chawech k'a rat nuyakon-q'anej ri nuq'a' richin yich'on awik'in.

¹⁰Rat man ye'aben ta meyel taq banobel chikikojol ri kaminaqi'; ri kaminaqi' man xkeyakatej ta chik pe richin nikiya' aq'ij.

¹¹Ri awajowabal man jun bey xtinatex chupan ri jul muqbel kamineq; chupan ri jul ri' man ninatex ta chik chi rat man yojamalij ta kan.

¹²Chiri' akuchi janila q'equ'm kan man jun bey nitz'etetej ri meyel taq abanobal; ni man ninatex ta ri ruchojmilal ri naben rat, chupan ri jul akuchi ri xa nimestex ronojel.

¹³Jak'a yin kan awik'in k'a rat nimalej Jehová in ch'owineq-wi, ronojel k'a nimaq'a' napon-q'anej ri nuch'owen chawech rat.

¹⁴¿Achike k'a roma yinawixowaj yin? ¿Achike roma man yinatzu' ta pe?

¹⁵Kan ja yan ri pa nuk'ajolil in k'ayewatajineq-pe y kan in apowineq chuwi' kamik, janila k'a k'iy mul abanon chuwe chi nintej poqon y wakami man ninkoch' ta chik.

¹⁶K'iy k'a mul yakatajineq awoyowal chuwij, y kan yijitz'atej roma xibinri'il.

¹⁷Kan achi'el nuben ri ya' ri nibusku'l, keri' xuben ri awoyowal chuwij, y wakami kan ink'o pa latz'.

¹⁸Xe'ach'er k'a el chuwe yin ri kan ketaman nuwech, y ri wachibil wakami, xa kan ja ri q'equ'm.