Read Kaqchikel Sal 9 Bible Online

Sal 9 - Kaqchikel bible

Sal 9

¹Jehová, kan ninya' aq'ij rik'in ronojel wánima. Kan xtintzijoj k'a ronojel ri meyel taq abanobal.

²Kan xkikikot y xkinimaq'ijun awik'in rat. Kan xtinbixaj ri abi', rat ri atk'o pa ruwi' ronojel.

³Ri e etzelanel wichin kan ye'animej k'a chawech rat. Toq nak'ut-awi' chikiwech, rije' xa yetzaq y yek'is.

⁴Rat kan pa ruchojmilal k'a xaq'et-tzij pa nuwi'; kan k'a chiri' k'a pan atz'uyubal richin q'atbel-tzij xach'on pa nuwi'.

⁵Xaben k'a chike ri winaqi' richin ri ruwach'ulew chi xkixibij-ki'; xe'ak'is k'a ri e banoy taq etzelal; xaben chi ri kibi' man jun bey chik xnatex chuwech re ruwach'ulew.

⁶Ri e etzelanel kan xek'is k'a richin jantape'; kan xetzaq k'a ri nima'q taq kitinamit ri xe'atzeq rat. Kan man jun k'a natabel kichin xk'oje' kan.

⁷Jak'a ri Jehová kan xtik'oje' tibe-q'ij tibe-seq. Xtik'oje' k'a chupan ri rajawaren richin nuq'et-tzij.

⁸Rija' xtiq'aton-tzij pa ruwi' ri ruwach'ulew rik'in ruchojmilal; kan xtuya' k'a pa kiwi' ri tinamit ri ruk'amon.

⁹Rija' kan xkeruto' k'a ri yetz'ilox, rik'in k'a rija' xtikito-wi-ki' ri ek'o pa q'axo'n.

¹⁰Jehová kan awik'in k'a rat xtikikuquba-wi kik'u'x ri ketaman awech, roma rat, man jun bey ye'amalij kan ri yekanon awichin.

¹¹Tibixaj rubi' ri Jehová, ri k'o chiri' pa Sión. Titaluj k'a rutzijol ri pa taq tinamit ri nima'q taq rubanobal.

¹²Ri Dios kan ye'oqaqa chuk'u'x ri ek'o pa tijoj-poqonal y nrak'axaj ri kich'owen; y kan nuya' k'a rutojbalil chike ri kamisanela'.

¹³Tabana' utzil Jehová tajoyowaj nuwech yin; tatzu' re q'axo'n re nink'owisaj koma ri ye'etzelan wichin, kan kinakolo' k'a chuwech ri kamik,

¹⁴keri' yin xkitikir xtinq'alajirisaj chuchi' ri Jerusalem, chi xaxe rat ruk'amon niya'ox aq'ij, chiri' k'a xkikikot-wi yin, roma kan in akolon.

¹⁵Ri winaqi' richin ch'aqa' chik ruwach'ulew xekibanala' jul, xekiyala' pikbel y xa ja rije' ri xeqaqa chupan.

¹⁶Ri Jehová kan xuk'ut k'a ri' chi rija' pa ruchojmilal niq'aton-wi-tzij; jak'a ri e banoy taq etzelal xa xetzaq chupan ri pikbel ri kibanon rije'.

¹⁷Ri e banoy taq etzelal xa xke'apon chupan ri jul richin muqbel, ri maneq Dios chikiwech xa chupan k'a ri tojbel-mak xkebe-wi.

¹⁸Ri Dios kan man yerumestaj ta ri k'o nik'atzin chike, ri oyobenri'il kichin ri ek'o pa meba'il, kan man xtik'is ta qa.

¹⁹¡Jehová, kayakatej k'a! man taya' q'ij chi ri winaqi' nikinimirisaj-ki' chawech rat. Taq'ata-tzij pa kiwi' ri man yatkitzeqelibej ta.

²⁰Taya' xibinri'il kik'in rije'. Tiketamaj k'a ri ch'aqa' chik ruwach'ulew chi rije' xa e winaqi'.