Read Kaqchikel Sal 98 Bible Online

Sal 98 - Kaqchikel bible

Sal 98

¹Kan tibixaj k'ak'a' taq bix chire ri Jehová, roma rija' rubanon nima'q taq banobel. Rija' kan xch'akon k'a roma ri ruchuq'a' ri loq'olej ruq'a'.

²Kan xuq'alajirisaj k'a ri ch'akonik ri xuben. Xuk'ut k'a ri ruq'atoj-tzij chikiwech ri winaqi' ri man nikitzeqelibej ta rija'.

³Xuben k'a ri rubin chike ri e rijatzul kan ri Israel. Roma ri rajowabal ri man k'isel ta, man yerumalij ta kan. Konojel k'a winaqi' ri ek'o k'a pa taq ruk'isibel chire ri ruwach'ulew xkitz'et ri rukolotajik.

⁴Konojel k'a ri winaqi' richin ri ruwach'ulew, kan rik'in k'a kikoten kebixan chire ri Jehová. Rik'in ronojel kuchuq'a' kech'on y tikipaq'apa' ri kiq'a' y tikibixaj bix.

⁵Tibixaj bix chire ri Jehová rik'in arpa. Tiq'ojomaj k'a jalajoj ruwech q'ojom.

⁶Tiya' ruq'ij ri Jehová rik'in trompeta, y rik'in xupubel ri e banon rik'in uk'a'. Kan keri' tibana' chuwech ri Jehová ri rey.

⁷Kan kewajin k'a ri palou y ronojel ri ek'o chupan. Ri ruwach'ulew y konojel ri ek'o chuwech kan kenimaq'ijun k'a.

⁸Xtik'oje' k'a janila kikoten, achi'el ri raqen taq ya' kan yewajin, y ri nima'q taq juyu' kan nikik'ut k'a chi yekikot.

⁹Ronojel re' xtik'uluwachitej, roma ri Jehová kan xpe richin noruq'ata-tzij pa ruwi' ri ruwach'ulew. Xtuq'et k'a tzij rik'in ruchojmilal. Xtuq'et tzij pa kiwi' ri tinamit, y xtuya' chike ri ruk'amon.