Read Kaqchikel Pro 1 Bible Online

Pro 1 - Kaqchikel bible

Pro 1

¹Re etamabel taq tzij re' e richin ri Salomón, ri ruk'ajol kan ri David y rey pa ruwi' ri tinamit Israel.

²Re etamabel taq tzij re' richin chi ri wineq nril na'oj y etamabel, richin chuqa' chi ri wineq niq'ax chuwech ri ch'abel ri nima'q ye'el-wi.

³Re' kan richin k'a chi ri wineq nik'ase' rik'in etamabel nik'ase' pa ruchojmilal, utz y kan pa rubeyal nuben kik'in konojel.

⁴Re' chuqa' kan richin chi ri maneq ok ketamabal ye'ok nowineq, richin chi ri k'a e ak'uala' na nik'oje' ketamabal y nikiya' rukojol ri utz y ri man utz ta.

⁵Ri aj-na'oj ri kan nrak'axaj re', ri retamabal nibe más pa jotol, y ri kan niq'ax chuwech, kan xtretamaj k'a ri achike ruk'amon chi nuben.

⁶Richin chi ri wineq ri' niq'ax chuwech ri etamabel-tzij y ri ye'el chi tzij, richin chuqa' chi xtiq'ax chuwech ri kitzij ri aj-na'oj y nitikir nusol-rij ri etamabel ri e tz'apel chupan ri tzij ri'.

⁷Ri wineq ri kan k'o rukiy ri Dios chuwech, chiri' k'a xtipe-wi ronojel ri runa'oj ri nik'atzin chire. Jak'a ri wineq nakanik kan nrixowaj ri na'oj y ri tijonik.

⁸Kan jebel k'a tiya' ixikin rix alk'ualaxela', chire ri tijonik richin ri itata', y man tiwixowaj ri nuk'ut chiwech ri ite'.

⁹Roma re' kan xke'ok jun wiqobel ri nik'oje' pan ijolon, kan xke'ok k'a chuqa' achi'el jun ichinaj ri nikiwiq jebel ri ruwa taq ik'u'x.

¹⁰Rix alaboni', wi ri e banoy etzelal nikajo' chi yixok ta kachibil, rix kan man tiwajo' chi yixbe kik'in.

¹¹Rik'in juba' nikibij chiwe: Kixanpe qik'in, tiqabana' jun pikbel y achike na k'a wineq xtiqaqa chupan, y ri nakanik ri xtiqaqa chupan, xtiqakamisaj.

¹²Xa jubeq' k'a xtiqabanala' chike ri winaqi', achi'el nuben ri jul chike ri ch'akulaj e kaminaqi' chik. Xa kan chi tz'aqet xkeqabeq', achi'el toq k'o jun ri nitzaq pa jun jul.

¹³Rik'in re', kan k'iy k'a ruwech chi beyomel xtiqak'en kan chuwi-kiq'a', y ronojel re xtiqak'en chuwi-kiq'a' rije', kan xtunojisaj ri qachoch.

¹⁴Kixanpe k'a qik'in y tiqatejtobej ronojel, y chuqa' xaxe jun xtiqaben chire ronojel ri xtiqil chiqajujunal, xkecha' chiwe.

¹⁵Jak'a rix alaboni', kan man k'a ke'itzeqelibej rije' chupan ri bey ri kik'uan, xa kan tijech'ej kan iwi' chire ri kibey rije'.

¹⁶Roma rije' kan e anineq chubanik ri etzelal, y kan e anineq chuqa' chubanik kamik.

¹⁷Ri pikbel ri nikiya' rije' chiwech man nik'atzin ta, roma kan q'alaj-wi jebel.

¹⁸Y man ketaman ta chi xa ja rije' xkeqaqa chupan ri pikbel. Xa kan ja ri kik'aslen rije' ri xtapon ri pa kamik.

¹⁹Kan k'a chiri' k'a ye'apon-wi ri winaqi' ri janila eleq' kibanalon, kan jari' ri xtelesan ri kik'aslen.

²⁰Ri na'oj xa kan nuben achi'el jun wineq, nisik'in ri pa taq bey. Ri na'oj kan rik'in uchuq'a' nich'on, ri akuchi nikimol-wi-ki' ri winaqi'.

²¹Ri na'oj kan ja ri pa ruwi' ri tz'aq kow nich'on-pe, y ri akuchi k'o-wi ri okibel richin ri tinamit chiri' nuya-wi rutzijol.

²²Rix ri kan man k'iy ta ok iwetaman, ¿kan jantape' k'a xtiqa' chiwech chi man k'iy ta iwetaman? Rix ri xa maneq ik'ix, ¿kan jantape' k'a xtiqa' chiwech ri xa k'ixbel chikiwech ri winaqi'? Rix ri nik'atzin chi k'o ta iwetamabal, ¿kan jantape' k'a xtiwetzelaj ri etamabel?

²³Y wi rix kan nitzolin k'a pe ik'u'x wik'in roma re yixinch'olij, yin kan xtinben k'a chi xtok ri nu-espíritu ri pan ik'aslen y chuqa' kan xtinbij k'a chiwe ri ch'abel ri ninwajo' chi ninya' chiwe.

²⁴Jak'a rix xa man yiniwak'axaj ta, kan man jun nuben chiwe toq yin ninyuq nuq'a' richin chi yixinto',

²⁵rix xa nijech'ej kan ri pixabanik ri ninya' chiwe, y xa niwetzelaj ri ch'olinik ri ninben chuqa' chiwe.

²⁶Xa roma ri' toq yin kan xkitze'en k'a chiwij toq xtiqaqa ri ruk'ayewal pan iwi', y xkixinyojobej toq xkixapon chupan ri xibinri'il ri xa man iwoyoben ta.

²⁷Kan xkitze'en k'a chiwij toq xtiqaqa ri tijoj-poqonal pan iwi', achi'el jun nimalej kaq'iq', xkitze'en k'a chiwij toq xtipe ri wululen chiwij, achi'el jun surkum ri yixrumes-el, xkitze'en k'a chiwij toq xtipe kamik y jalajoj ruwech oyowal pan iwi' y kan xtuqasaj iq'ij.

²⁸Y jari' toq rix kan xkiniwoyoj richin yixinto', jak'a yin man xkiniman ta chiwe; k'ari' toq rix xkinikanola' y xa man xkiniwil ta chik.

²⁹Y kere' xtik'uluwachij roma xa xiwetzelaj ri tijonik, y roma chuqa' kan maneq chik rukiy ri Dios chiwech.

³⁰Chuqa' roma ri man jun rejqalen xiben chire ri pixabanik ri xinya' chiwe, y kan xiniwetzelaj toq yin xixinch'olij.

³¹Rix xa kan xtik'ul yan k'a ri ruk'amon chi nik'ul roma ri itzel ibanobal, y roma kan janila k'iy ruk'exel ri itzel pixabanik ri xtik'ul, kan xtik'o ik'u'x chire.

³²Roma ri wineq ri man k'iy ta retamabal y man niniman ta tzij, xa jari' ri xtikamisan richin, y ri maneq runa'oj y nuben ri achike niqa' chuwech rija', ruyon rija' nuqasaj ruq'ij.

³³Jak'a ri wineq ri kan nuben ri nubij ronojel re na'oj re', kan kuqul k'a ruk'u'x xtik'ase', kan k'o k'a uxlanen pa ruk'aslen, y man nuxibij ta ri' chi k'o ta nuk'uluwachij.