Read Kaqchikel Pro 10 Bible Online

Pro 10 - Kaqchikel bible

Pro 10

¹Ja ch'aqa' chik etamabel-tzij re' ri e rutz'iban kan ri rey Salomón: Jun alk'ualaxel ri k'o runa'oj kan jun kikoten chike ri rute-rutata'. Jak'a ri alk'ualaxel ri xa maneq runa'oj, xa jun bis chike rije'.

²Ri beyomel ri xa man choj ta ruch'akik, man kan ta k'iy utzil nuk'en-pe, jak'a ri chojilej k'aslen, nikolon chuwech ri kamik.

³Ri Jehová kan man nuya' ta q'ij chi ri choj ruk'aslen nutej wayjal, jak'a ri aj-maki' kan man nuya' ta chike ri janila nikajo'.

⁴Ri kan man yeruya' ta ri ruq'a-raqen pa samaj, xa meba'il nuk'en-pe chire; jak'a ri ruq'a-raqen ri samajel, kan nikik'en-pe beyomel chire.

⁵Roma ri' ri wineq ri kan k'o k'a ruwech rutiko'n ri nuk'ol, kan xnojin-wi jebel; jak'a ri xa man xnojin ta jebel, xa niwer rokik ri ch'aqa' chik nikik'ol ruwech kitiko'n.

⁶Pa ruwi' ri wineq choj ruk'aslen, kan urtisanik k'a ri niqaqa-pe, jak'a ri pa ruchi' ri wineq aj-mak, xa ch'abel richin oyowal xtuk'en-pe.

⁷Ri natabel kichin ri winaqi' choj kik'aslen, kan rik'in kikoten yenatex; jak'a ri winaqi' ri xa itzel kik'aslen, xa man yenatex ta chik.

⁸Ri wineq ri kan k'o na'oj rik'in, kan nrak'axaj y nuben k'a ri nibix chire; jak'a ri wineq ri yerubila' tzij ch'obon man ch'obon, nipe ruk'ayewal chirij.

⁹Ri wineq ri kan choj yerubanala', kan kuqul k'a ruk'u'x neleyaj. jak'a ri xa nuchop yerubanala' itzel taq banobel, kan xtibek'is chupan ri itzel ri yerubanala'.

¹⁰Ri wineq ri man nuq'alajirisaj ta ri qitzij, xa jun tz'ukuy richin oyowal; y chuqa' ri wineq ri xa maneq runa'oj ri nich'on, xa yerunim y yerutzeq ri ch'aqa' chik.

¹¹Kan achi'el alaxibel-ya' richin k'aslen, ri ruch'abel ri wineq ri choj ruk'aslen; jak'a ri kich'abel ri winaqi' ri itzel kibanobal, xa ruyon oyowal nikik'en-pe.

¹²Ri etzelanik k'iy ruwech oyowal yeruyek-pe. Jak'a ri ajowabel nitikir nukuy ronojel ruwech mak.

¹³Pa ruchi' jun wineq etamanel, chiri' ye'el-wi-pe ri ch'abel richin na'oj, jak'a ri xa maneq na'oj rik'in, xa ch'ayikil ri niqaqa chirij.

¹⁴Ri winaqi' ri kan k'o kina'oj, kan nikiyek k'a jebel ri etamabel. Jak'a ri xa maneq na'oj kik'in, ri kich'abel kan chi'anin yekibanala' ch'a'oj.

¹⁵Ri rubeyomel ri beyom, kan junan rik'in jun tinamit ri k'o tz'aq chirij, jak'a ri wineq ri man jun k'o rik'in, man jun rutobal, xa ja ri rumeba'il ri nitzaqo richin.

¹⁶Ri wineq ri choj ruk'aslen, ri ruch'akoj ja ri k'aslen, jak'a ri man choj ta ruk'aslen, ri nuch'ek xa ruyon rutojbalil-mak.

¹⁷Kan bey k'a richin k'aslen ruk'uan ri wineq ri kan nuben ri pixa' ri k'utun chuwech, jak'a ri xa man niqa' ta chuwech ri ch'olinik, xa xtisach rik'in ri ruk'aslen.

¹⁸Ri nrewaj chi itzel nuna' chire jun chik wineq, xa ka'i' rupalej, ri kan chi'anin nuq'alajirisaj-apo ri nuna', xa maneq runa'oj.

¹⁹Toq kan janila k'iy ch'owen niban, kan yebitej chuqa' ri man ruk'amon ta, jak'a ri kan nitikir nuq'et-ri', kan k'o-wi runa'oj.

²⁰Ri rejqalen ri ruch'abel ri wineq ri kan choj ruk'aslen, kan achi'el rejqalen ri ch'ajch'ojilej saqipueq; jak'a ri ch'abel ri yepe pa ránima ri wineq ri itzel rubanobal, xa kan maneq ok rejqalen.

²¹Ri ruch'abel ri wineq ri choj ruk'aslen, kan k'o utz nuk'en-pe chike ri winaqi'; jak'a ri wineq ri xa maneq ok runa'oj, ni rija' man nitikir ta nuto-ri' y pa kamik napon-wi.

²²Ri urtisanik richin ri Dios, kan nuk'en-pe beyomel chike ri winaqi'; y ri winaqi' xa man rik'in ta k'a tijoj-poqonal toq nikiq'i-q'anej ri'.

²³Ri kikoten chuwech jun wineq ri xa maneq runa'oj, ja ri nuch'ob nuben etzelal, jak'a chuwech jun achin ri utz ruch'obonik, kan jun kikoten ri na'oj.

²⁴Ri wineq banoy etzelal kan nuk'uluwachij k'a ri nuxibij ri' chuwech, jak'a ri wineq choj ruk'aslen kan nuk'ul-wi ri janila rurayiben.

²⁵Roma ri' toq nipe ruk'ayewal chirij ri banoy etzelal, jari' ri nuk'uan-el richin, jak'a ri wineq ri choj ruk'aslen, kan ja ri Dios ri kow nichapo richin.

²⁶Ri vinagre nuben chire ri eyaj chi nijuch'uch', ri sib nuben chike ri runaq'-wachaj chi nibiyin-pe ya' chupan, keri' k'a nikiben ri winaqi' q'ori' chike ri ek'o pa kiwi'.

²⁷Ri wineq ri k'o rukiy ri Dios chuwech, nukochij más q'ij ruk'aslen, jak'a ri e banoy richin ri etzelal, ri Dios xa nuqupij chi'anin ri kijuna' chuwech re ruwach'ulew.

²⁸Ri oyobenik ri nuben jun wineq ri kan choj ruk'aslen, kan k'o ruk'ojlen. jak'a ri oyobenik ri nikiben ri winaqi' ri yebanon etzelal, xa man jun nuk'en-pe chike.

²⁹Ri Dios kan yeruto' k'a konojel ri winaqi' ri kan tz'aqet ri kik'aslen, y yeruk'is k'a konojel ri winaqi' ri yebanon etzelal.

³⁰Ri wineq ri kan choj ri ruk'aslen, kan man jun bey xtisilon-el ri akuchi k'o-wi, jak'a ri winaqi' ri yebanon etzelal man xkeyaloj ta el chuwech re ruwach'ulew.

³¹Ri ruch'abel ri wineq, ri choj ruk'aslen, kan ruyon k'a na'oj ri nuq'alajirisaj, jak'a ri kich'abel ri e banoy etzelal, xa xtiq'at.

³²Pa ruchi' ri wineq ri choj ruk'aslen, ruyon utzilej taq ch'obonik ri ye'el-pe, jak'a pa ruchi' ri wineq banoy etzelal, ruyon yoq'onik ri ye'el-pe.