Read Kaqchikel Pro 11 Bible Online

Pro 11 - Kaqchikel bible

Pro 11

¹Ri Dios kan man utz ta yerutz'et ri winaqi' ri ye'ukusan pajbel ri xa ye'eleq', jak'a kan nikikot ri ránima kik'in ri winaqi' ri ye'ukusan pajbel ri kan e tz'aqet,

²Toq nipe nimirisanen pa ruk'aslen ri wineq, xa kan k'o chuqa' ri niqasan ruq'ij, jak'a ri wineq ri xa ch'uti'n nuna-ri' kan q'alaj chi ri na'oj kan k'o rik'in.

³Ri kan tz'aqet ri ruk'aslen, ja ri ruchojmilal ri ruk'aslen ri uk'uey rubey; jak'a ri wineq ri xa ruyon man qitzij ta ri yeruben, ja ri itzel rubanobal ri nisachon richin.

⁴Toq ri Dios xtuq'et-tzij, ri beyomel xa man xtukol ta ri wineq, jak'a ri chojmilej k'aslen kan nukol ri wineq chuwech ri kamik.

⁵Kan ja ri chojmilej ruk'aslen ri utzilej wineq, jari' ri nibanon utz chire ri rubey; jak'a ri wineq ri banoy etzelal, ja ri itzel rubanobal ri nitzaqo richin.

⁶Kan ja ri chojmilej ruk'aslen ri nikolon richin ri utzilej wineq, jak'a ri wineq ri kan nowineq chubanik etzelal, ja ri itzel rubanobal ri nichapo kan.

⁷Toq ri wineq banoy etzelal niken, nik'is k'a chiri' ronojel ri xurayij, y kan nik'is chuqa' chiri' ri rurayibel chi xril ta el beyomel chuwech re ruwach'ulew.

⁸Ri wineq ri choj ruk'aslen nitotej-el chuwech ri ruk'ayewal ri k'aslen, y ri nik'oje' kan chuxe' ri ruk'ayewal ri k'aslen, ja ri banoy richin ri etzelal.

⁹Ri wineq ri maneq Dios chuwech, nuya' pa ruk'ayewal ri rachpochel xaxe rik'in ri ch'abel ri nubij chire; jak'a ri choj kik'aslen, yetikir nikikol-ki' rik'in ri etamabel k'o kik'in.

¹⁰Ri kojol-jay richin ri tinamit k'o kikoten, toq ri choj kik'aslen yebe pa jotol, y chuqa' kan k'o kikoten toq ri e banoy etzelal yebe pa xulan.

¹¹Ri tinamit kan nibe k'a pa jotol, roma ri urtisanik ri nikik'ul ri choj kik'aslen, ri tinamit xa nitzaq, roma ri ch'abel ri ye'el pa kichi' ri e banoy etzelal.

¹²Ri wineq ri xa maneq runa'oj, nuqasaj ruq'ij ri rachpochel rik'in ri ruch'abel, jak'a ri achin ri kan k'o-wi retamabal, nuchajij-ri' rik'in ri ruch'abel.

¹³Ri wineq ri xaxe tzij nuben, kan man jun ri xtipa'e' chuwa ri raq', jak'a ri wineq ri kan choj ránima, kan yeruyek ri pa ránima ri yebix chire.

¹⁴Ri tinamit k'a ri akuchi xa e maneq utzilej uk'uey bey, xa nitzaq, jak'a xa nikolotej ri tinamit ri akuchi kan ek'o winaqi' ri k'o utzilej taq na'oj kik'in,

¹⁵Ri wineq ri kan nupaba' chuqa' ri' chuwech ruk'as jun wineq, kan jantape' k'o chuk'u'x, jak'a ri wineq ri xa man niqa' ta chuwech ri k'as, man jun k'a achike ta xtuch'ob.

¹⁶Jun ixoq ri janila jebel ránima, kan netamex k'a ruwech koma ri winaqi', y ri kan nikicha' k'a kik'u'x chire ri samaj, kan nikil k'a beyomel.

¹⁷Jun wineq ri kan janila jebel runa'oj, kan k'o chuqa' utzil ri nuk'ul chike ri winaqi'; jak'a ri wineq ri kan janila itzel runa'oj, kan chuwech yan re ruwach'ulew nuk'ul-el etzelal.

¹⁸Ri wineq nibanon etzelal, ri ch'akonik ri nril xa man qitzij ta; jak'a ri kan nutik ri chojmilal, ri ch'akonik ri nril kan qitzij wi.

¹⁹Ri wineq ri nuk'uaj jun chojmilej k'aslen, jari' ri nuk'uan richin chupan ri k'aslen; jak'a ri nuk'uaj jun itzelej k'aslen, xa jari' ri nuk'uan chupan ri kamik.

²⁰Ri Dios kan nrixowaj k'a ri wineq ri xa banoy etzelal, jak'a kan utz nutz'et ri rubanik ri wineq ri kan tz'aqet ri ruk'aslen.

²¹Kan q'alaj wi k'a chi ri wineq itzel, kan man xtril ta rukolotajik, jak'a ri wineq ri kan choj ruk'aslen, kan jajun chuqa' ri e riy-rumam xkekolotej.

²²Achi'el jun wiqobel ri banon rik'in q'anapueq y xa chirutza'n jun aq k'o-wi, xa keri' k'a ri jun jebejoj ok jun ixoq y xa nuk'ut chi maneq retamabal.

²³Xa ruyon k'a utz ri royoben-apo ri wineq ri kan chojmilej k'aslen ri ruk'uan, jak'a ri winaqi' ri kijachon-ki' chubanik ri etzelal, xa ruyon ruk'ayewal ri peteneq ri chikiwech-apo.

²⁴Ri winaqi' ri man nikik'ek'ej ta yesipan, kan jantape' k'iy k'o kik'in, y ri xa kan nikipoqonaj nikisipaj ri k'o kik'in, jantape' man jun k'o kik'in.

²⁵Ri wineq ri kan man nuk'ek'ej ta nusipaj ri k'o rik'in, kan xtuk'ul k'a rajel-ruk'exel, y toq nuya' ruya' jun ri nichaqchi'in, rija' chuqa' kan k'o ri xtisipan ruya'.

²⁶Ri kan k'iy k'a rujal k'o y choj ruyakon chiri', ri winaqi' xtikoyoj ri ruk'ayewal pa ruwi', jak'a ri kan k'o rujal y nrelesaj-pe richin nuk'ayij, ri winaqi' kan xtikik'utuj urtisanik pa ruwi'.

²⁷Ri wineq ri kan ja ri utz ri nukanoj, kan nril ri utzil; jak'a ri jun ri xa ja ri etzelal nukanoj, kan jari' ri itzel ri xtiberuk'ulu-pe.

²⁸Ri wineq ri kan nukuquba' ruk'u'x rik'in ri beyomel k'o rik'in, xa xtitzaq, jak'a ri kan choj ri ruk'aslen, kan nibek'ulun-pe achi'el ri rex ruxaq-che'.

²⁹Ri wineq ri nitz'ukun-q'anej oyowal chikikojol ri aj pa rachoch, man jun xtapon-wi; y ri kan maneq runa'oj, xa xtibek'is pa samaj rik'in ri kan k'o-wi runa'oj.

³⁰Ri nuk'en-pe ri utzilej ruk'aslen ri wineq, kan achi'el ri ruwech ri che' richin k'aslen; y ri wineq ri kan k'o runa'oj, kan yeruch'ek k'aslen richin ye'ok richin ri Dios.

³¹Kan qitzij wi chi ri choj ruk'aslen, kan chuwech yan re ruwach'ulew nuk'ul-el rajel ruk'exel; jak'a ri wineq itzel y ri aj-mak, kan más ruk'amon chi nikik'ul yan el rutojbalil re chuwech re ruwach'ulew.