Read Kaqchikel Pro 12 Bible Online

Pro 12 - Kaqchikel bible

Pro 12

¹Xabachike k'a wineq ri utz nuna' nitijox, kan utz k'a nuna' chire ri etamabel; jak'a ri xa itzel nuna' chire ri ch'olinik, xa maneq runa'oj.

²Ri wineq utz, kan k'o utzil ri nril rik'in ri Dios; jak'a ri wineq ri ruyon etzelal k'o pa ruk'aslen, xa ruk'ayewal niya'ox chire roma ri Dios.

³Ri wineq ri kan nujech-ri' chubanik etzelal, man k'ayew ta richin nelesex-el; jak'a ri kan choj-wi kik'aslen, ruk'amon-qa kixe', roma ri' man jun bey xke'elesex-el.

⁴Ri ixoq ri kan ja ri pa ránima nipe-wi richin nuben utz, nunimirisaj k'a ruq'ij ri rachijil; jak'a ri ixoq ri xa ruyon man utz ta ek'o pa ránima, xa nuya' ruyabil ri rubaqil ri rachijil.

⁵Ri ruch'obonik ri wineq ri choj ruk'aslen, kan ja ri nuben utz chikiwech ri ch'aqa' chik winaqi'; jak'a ri wineq ri kan itzel ruk'aslen, xaxe k'a nuch'ob achike rubanik nuben richin yeruq'ol ri winaqi'.

⁶Ri tzij ri k'o pa kichi' ri winaqi' itzel kik'aslen, xaxe richin kamisanik; jak'a ri kich'abel ri winaqi' ri e utz, kan richin nikolon chuwech ri kamik.

⁷Ri winaqi' ri e itzel, xa jumul xkek'is-el; jak'a konojel ri kan choj kik'aslen, kan k'a yek'oje' na kan.

⁸Kan achi'el k'a rubanik ri na'oj ri k'o rik'in ri wineq, kan ja chuqa' ri' rubanik ri ruq'ij ri xtuk'ul; jak'a ri wineq ri itzel nich'obon, xa netzelex koma ri ch'aqa' chik winaqi'.

⁹Más utz ri man niya'ox ta awejqalen, xaxe ta k'o nilin awichin; ke chuwech nabananej chi k'o aq'ij, y xa ni ta jun away k'o richin natej.

¹⁰Ri wineq ri choj ruk'aslen kan yeruquqa' chuqa' ri rawej, richin man nikitej wayjal; jak'a ri winaqi' ri kan e itzel, kan yekiya' pa ruk'ayewal.

¹¹Ri kan jebel yerusamajij ri rulew, kan k'o k'a k'iy richin nutej. jak'a ri xaxe nuch'ob chi k'o nrajo' nuben y man nisamej ta, xa jun nakanik.

¹²Ri nitzaqo richin ri wineq ri kan itzel, ja ri itzel taq rayinik ri ek'o rik'in. Jak'a ri choj ruk'aslen kan niwachin ri ruk'aslen, roma jebel ri akuchi tikil-wi ri ruxe'.

¹³Roma ri mak ri ye'el pa ruchi' ri wineq, nitzaq pa pikbel richin ri wineq itzel; jak'a ri wineq ri kan choj ruk'aslen, rik'in ri ruchi' nikolotej chuwech ri ruk'ayewal.

¹⁴Ri nibanon chire ri wineq chi nikuqer ruk'u'x, ja ri utzilej taq ch'abel ri yerubij; y kan achike k'a rubanik rusamaj jun wineq, kan ja chuqa' ri' ri rajel ruk'exel ri xtuk'ul.

¹⁵Ri xa maneq runa'oj kan nuch'ob chi ri rubanobal rija' jari' ri utz, jak'a ri kan k'o runa'oj, xa k'a nrak'axaj na ri nikibij ri ch'aqa' chik winaqi'.

¹⁶Ri xa maneq runa'oj kan chi'anin nuk'ut chi k'o royowal; jak'a ri kan nowineq man nuk'ut ta ri ruk'ixbilal, roma niqasex ruq'ij.

¹⁷Ri kan ruyon qitzij ri nuq'alajirisaj chirij jun chik wineq, kan q'alaj chi jun choj wineq; jak'a ri xa ruyon tz'ukun taq tzij ri yeruq'alajirisaj chirij jun chik wineq, kan q'alaj chi xa banoy etzelal.

¹⁸Ek'o winaqi' ri man nikipoqonaj ta yech'on, y ri kich'abel xa yesokon achi'el espada; jak'a ri kaq' ri kan k'o-wi na'oj kik'in, ri ch'abel ri yekibij kan ye'aq'oman k'a.

¹⁹Ri ch'abel ri yerubij jun wineq ri xaxe ri qitzij ri nubij, kan yeyaloj k'a; jak'a ri ch'abel ri yerubij jun wineq ri xa tz'ukuy-tzij, xaxe ok richin jun ti ramaj.

²⁰Ri kan k'o pa kinojibal chi k'o ri nikajo' nikiben chire jun wineq, xa k'ayilej k'aslen ri nikil; jak'a ri kan k'o pa kinojibal chi nikiya' uxlanen pa ruk'aslen jun wineq, nuk'en-pe kikoten chike.

²¹Kan man jun k'a ruk'ayewal ri xtok'ulun ta pa ruk'aslen jun wineq ri kan choj ruk'aslen; jak'a ri ruk'aslen ri wineq ri kan itzel, kan nojineq rik'in ruk'ayewal.

²²Ri Jehová kan yeretzelaj ri winaqi' ri nikikusaj ri kichi' richin yetz'ukun-tzij; y kan nikikot ri ránima kik'in ri kan jantape' qitzij yech'on.

²³Ri wineq ri k'o retamabal kan man nunabej ta k'a chi k'o retamabal; jak'a ri wineq maneq ok retamabal kan ja rija' ri nrajo' nich'on nabey y xa nuk'ut chi maneq ok retamabal

²⁴Ri wineq ri kan jebel nisamej, xtiban k'a chire chi ja rija' ri xtik'oje' pa kiwi' ri samajela'; jak'a ri wineq ri xa nuq'oraj nisamej, xa xtiban chire chi tisamej.

²⁵Ri bis kan nuben k'a chire ri wineq chi maneq kikoten pa ránima; jak'a jun utzilej ch'owen, kan nuben chi nikikot ránima ri wineq.

²⁶Ri wineq ri kan choj ruk'aslen, kan jebel nok uk'uey bey richin ri rachpochel. Jak'a ri rubey ri kik'aslen ri e banoy richin ri etzelal, yerusech ri kachpochel.

²⁷Ri wineq kanonel ri xa k'o ruq'oral, xa man jun chikop xtril richin chi nusa'; jak'a ri wineq ri kan nutej ruq'ij nisamej, jari' ri xtibanon chire chi xtibeyomer.

²⁸Chupan k'a ri rubey ri wineq ri choj, kan nilitej-wi k'aslen; jak'a chupan ri rubey ri wineq ri nuben xaxe ri nrajo' rija', nilitej kamik.