Read Kaqchikel Pro 13 Bible Online

Pro 13 - Kaqchikel bible

Pro 13

¹Ri alk'ualaxel ri kan k'o runa'oj, kan niqa' chuwech chi nitijox roma ri rutata'. jak'a ri alk'ualaxel ri kan nunimirisaj-ri' man nrak'axaj ta ni rik'in ch'olinik.

²Toq niwachin jebel ri kich'abel ri choj kik'aslen, jari' nok achi'el kiway; jak'a ri winaqi' ri kan nikiq'ej ri kitzij, ri nok achi'el kiway ja ri oyowal.

³Ri wineq kan nuchajij k'a ri ruk'aslen, rik'in nuchajij ri ruchi'; jak'a ri bilon man bilon ri yerubila', ja rija' k'a nikanon ri nipe chirij.

⁴Ri wineq janila q'or xaxe choj nurayij y man jun nuben, roma ri' man jun nril pa ruk'aslen; jak'a ri wineq ri kan k'o nurayij y kan kow nisamej, nibe pa jotol.

⁵Ri wineq ri choj ruk'aslen man utz ta nuna' chire ri tz'ukun taq tzij, jak'a ri banoy richin etzelal, nuq'abaj tzij y nuya' kik'ix ri winaqi'.

⁶Ri chojmilej k'aslen, jari' ri nito'on richin ri wineq ri kan tz'aqet ruk'aslen, jak'a ri itzel taq banobel, jari' ri nibanon chi nitzaq ri aj-mak.

⁷Ek'o winaqi' ri kan nikibananej chi e beyoma' y xa man jun k'o kik'in; y ek'o ch'aqa' chik nikiben chi man jun k'o kik'in y xa nimalej taq beyomel kiyakon.

⁸Ri wineq beyom, rik'in ri rubeyomel nukol ri ruk'aslen pa kiq'a' ri winaqi'; jak'a ri wineq ri man jun k'o rik'in, man jun ninaqo richin.

⁹Kan niyik'lun wi k'a achi'el jun saqil, ri rubanik ri ruk'aslen ri choj ruk'aslen; jak'a ri kik'aslen ri winaqi' e itzel, xa achi'el jun saqil ri beneq ruchupnen.

¹⁰Ri nimirisanenri'il, jari' ri nibanon chi k'o oyowal, jak'a kik'in ri kan nikak'axaj ri pixabanik, kan k'o na'oj.

¹¹Ri man utzilej beyomel ta ri nuben jun wineq, xa nik'is; jak'a ri beyomel ri nuben ri wineq rik'in ruchuq'a' ri ruq'a' rija', ninimer chuwech.

¹²Toq xa man nibanatej ta ri royoben-apo jun wineq, xa nuya' q'axo'n pa ránima; jak'a toq kan niq'ajer ri rurayibel, kan nok achi'el ri che' ri nuya' k'aslen.

¹³Ri wineq ri man nrajo' ta nuben ri nibix chire chi tubana', xa kan chirij rija' niqaqa-wi ri ruk'ayewal; jak'a ri wineq ri kan nimey tzij, kan ronojel k'a utz ri nuk'en-pe chire.

¹⁴Ri ralaxbal ri k'aslen nilitej k'a chupan ri tijonik richin ri aj-na'oj; y kan man nuya' ta q'ij richin chi nitzaq jun wineq pa pikbel richin kamik.

¹⁵Ri wineq ri janila jebel runa'oj, kan nril-wi utzil; jak'a ri kan rujachon-ri' chubanik etzelal, xa pa ruk'ayewal beneq-wi.

¹⁶Xabachike achin ri kan nowineq, kan jebel nuch'ob ri nuben; jak'a ri wineq ri maneq runa'oj, kan nuq'alajirisaj ri rubanik.

¹⁷Toq jun uk'uey rutzijol xa banoy richin etzelal, xa man ja ta rubanik ri niberubij; jak'a toq nitaq-el jun ri kan nuben ri nibix-el chire, kan nukanoj achike rubixik nuben chire.

¹⁸Meba'il y k'ixbilal k'a nuk'en-pe chire ri wineq ri xa man nrajo' ta pixabanik; jak'a ri wineq ri kan nuk'ul ri ch'olinik ri niban chire, kan niya'ox-wi ruq'ij.

¹⁹Kan jebel k'a nuna' ri ránima ri wineq toq kan nibanatej k'a ri rurayiben; jak'a ri xa man yech'obon ta jebel, kan man nikajo' ta ye'el-pe chupan ri itzel k'aslen.

²⁰Ri wineq kan nok k'a aj-na'oj, toq kan ja ri aj-na'oj yerachibilaj; y wi xa yerachibilaj ri xa maneq ok kina'oj, nuq'axaj k'a ruk'ayewal.

²¹Ri winaqi' e aj-maki' kan maneq k'a juba' uxlanen ri nikil pa ruq'a' ri etzelal; jak'a ri winaqi' ri kan choj ri kik'aslen, kan k'o k'a utz ri nikil pa kik'aslen.

²²Ri wineq ri kan utz, kan k'o k'a ri nuya' kan richin nikichinaj kan ri e riy-rumam; jak'a ri beyomel ri nuya' kan ri wineq aj-mak, kan niyake' kan, richin chi ja ri choj kik'aslen ri ye'ichinan.

²³Ri joxjik rulew ri maneq ok k'o rik'in, kan nuya' ri nik'atzin chire richin nik'ase'; jak'a ri xa man choj ta ri nuben chuwech ri Dios, xa niken-el roma ri rubanobal.

²⁴Ri man nrajo' ta nukusaj ri xik'a'y richin nuch'ey ri ralk'ual, xa man nrajo' ta k'a; jak'a ri tata'aj ri kan nrajo' ri ralk'ual, kan nucha' ruk'u'x richin nutijoj jebel.

²⁵Ri wineq ri choj ruk'aslen kan niwa' richin chi nik'o-el ri ruwayjal; jak'a ri wineq itzel, niwa' y xa man nitz'aqet ta ri ruwa'in.