Read Kaqchikel Pro 14 Bible Online

Pro 14 - Kaqchikel bible

Pro 14

¹Jun ixoq aj-na'oj kan nitikir-wi nuben chi kow yek'oje' ri aj pa rachoch; jak'a ri xa maneq runa'oj, xa ja rija' yetalun-el kichin.

²Jun ri kan nuben ri nibix chire roma ri Dios, kan choj k'a ri rubey ri ruk'aslen; jak'a ri wineq ri xa xotoxik ri rubanobal, rik'in ri' nuk'ut chi nretzelaj ri Dios.

³Ri ruch'abel ri wineq ri xa maneq runa'oj, xa ch'ayikil rik'in che' nroyoj chirij; jak'a ri ch'abel ri yerubij ri ruchi' ri wineq k'o na'oj rik'in, jari' ri nichajin richin.

⁴Ri akuchi e maneq bóyix richin ri samaj, maneq trigo; jak'a ri akuchi ek'o bóyix richin ri samaj, kan jebel k'a ch'akoj nuk'en-pe chire ri rajaw.

⁵Jun wineq ri niq'alajirisan ri achike xk'uluwachitej y man jun nrewaj, kan man nutz'uk ta ri nubij; jak'a ri wineq ri xa man qitzij ta ri nrajo' nuq'alajirisaj, xa ruyon e tz'ukun ri tzij ri yerubila'.

⁶Ri wineq ri xa niyojoben, kan man xtril ta ri na'oj; jak'a ri wineq ri kan nowineq, kan chi'anin k'a nuq'i-q'anej ri etamabel.

⁷Tajech'ej-el-awi' chire ri wineq ri xa maneq runa'oj, roma wi xa xkak'oje' kan rik'in, man jun bey xtawak'axaj ta ri etamabel.

⁸Kan q'alaj wi k'a toq ri wineq k'o runa'oj, roma kan jebel nuchajij-ri' chire ri rubanobal; jak'a ri maneq runa'oj y roma ri' ch'obon man ch'obon nuben, xa ruyon k'a nuq'ol ri'.

⁹Chikikojol ri maneq kina'oj, xa yetze'en chikij ri nikik'utuj kuyubel kimak toq yemakun; jak'a chikikojol ri choj kik'aslen, kan janila jebel ri kánima.

¹⁰Ri ránima ri wineq kan retaman k'a ri q'axo'n ri k'o rik'in; y chuqa' toq k'o kikoten rik'in, kan xaxe rija' ri nina'o.

¹¹Ri rachoch ri wineq itzel rubanobal, kan xtimes-el achi'el q'ayis, jak'a ri rachoch ri wineq ri kan choj ruk'aslen, kan xtiqaqa urtisanik pa ruwi'.

¹²Kan k'o-wi k'a bey ri choj niq'alajin chuwech ri wineq; jak'a ri pa ruk'isibel nibeq'alajin-pe chi xa bey richin kamik.

¹³Ri wineq stape' kan nitze'en ruwech, ri pa ránima xa nutej poqon; y xaxe nitane-qa chi tze'en, kan jari' noqaqa chik ri bis rik'in.

¹⁴Ronojel k'a ri nutik-qa ri wineq kan xtuwachij-wi; kan xtuwachij k'a stape' ja ri utz o ri man utz ta.

¹⁵Ri wineq ri maneq runa'oj, kan nunimaj ronojel ri nrak'axaj, jak'a ri kan nowineq, nuch'ob na rij jebel ri achike nuben.

¹⁶Ri wineq ri k'o na'oj rik'in, kan nuxibij-ri' chuwech ri Dios y man nutzeqelibej ta ri itzel bey; jak'a ri xa maneq runa'oj xa choj beneq y nim nuna-ri'.

¹⁷Ri wineq ri kan chi'anin nipe royowal, kan nuk'ut chi maneq runa'oj, y ri wineq ri kan k'o nutz'oq chuwi-kiq'a' ri winaqi' rik'in q'oloj xa xtetzelex.

¹⁸Ri nrichinaj kan ri wineq ri xa maneq runa'oj, ja ri man nitikir ta nich'obon chi utzil; jak'a ri e nowineq nikichinaj kan ri etamabel.

¹⁹Kan napon k'a ri q'ij toq ri winaqi' ri e itzel, kan xtikiya' kiq'ij ri e utz, y chuqa' ri winaqi' ri man e choj ta, xa xke'apon chuchi' rachoch ri choj ruk'aslen chuk'utuxik utzil.

²⁰Ri wineq ri kan man jun ok k'o rik'in, kan itzel nitz'et koma ri e rachk'uljay; jak'a ri beyom kan utz nitz'et koma konojel.

²¹Ri wineq ri kan nrixowaj ri rachk'uljay, kan mak wi ri nuben; jak'a ri wineq ri kan nujoyowaj ruwech ri man jun k'o rik'in, jebel ruwa-ruq'ij.

²²Kan qitzij wi chi ri winaqi' ri ruyon itzel taq ch'obonik k'o kik'in, xa e sachineq; jak'a ri k'o utzilej ch'obonik kik'in, kan nikil ri utz y nikil ri sujun chike.

²³Ronojel tijoj ruq'ijul ri nuben ri wineq, kan k'o-wi ri nuk'en-pe; jak'a ri wineq ri xaxe tzij ri nuben, xa pa meba'il nuk'uaj-wi.

²⁴Ronojel ri nikil ri winaqi' aj-na'oj, kan ja wi ri kina'oj niya'on chike; jak'a ri nikil ri maneq kina'oj, kan roma ri maneq kina'oj roma ri' jari' ri nikik'ul.

²⁵Kan yerukol-wi k'aslen jun wineq, ri kan nuq'alajirisaj ri qitzij chuwech ri q'atoy-tzij; jak'a ri xa tz'ukuj taq tzij yerubij, xa yerunim kan chuxe' ri ch'a'oj.

²⁶Ri wineq ri kan k'o rukiy ri Dios chuwech, kan xtril-wi ruchuq'a'; y ri ralk'ual rija' kan xtikil-wi ri chajinik richin ri Dios.

²⁷Ri akuchi nalex-wi-pe ri k'aslen, ja ri akuchi kan k'o rukiy ri Dios; y re' chuqa' kan nukol ri wineq chuwech ri pikbel ri kan ruk'amon-pe kamik.

²⁸Toq janila e k'iy winaqi' ek'o chuxe' ruq'a-raqen ri rey, nuben chire chi kan nim ruq'ij; y toq xa e juba' ok ri ek'o chuxe' ruq'a-raqen, xa nibe pa xulan.

²⁹Jun wineq ri man chi'anin ta nipe royowal, kan k'o-wi nim etamabel rik'in; jak'a ri xa chi'anin nijalajo' chuwech, xa niq'alajin chi maneq runa'oj.

³⁰Kan nuya' k'aslen chire ri ch'akulaj, toq ri ránima ri wineq kan utz; jak'a toq k'o ch'upun-k'u'x pa ránima, xa nuya' ruyabil ri rubaqil.

³¹Ri kan nutz'ila' ri xa man jun k'o rik'in, kan nuyoq' ri Dios ri banayon richin; jak'a ri kan utz runa'oj nuben kik'in ri k'o nik'atzin chike, kan nuya' ruq'ij-ruk'ojlen ri Dios.

³²Toq kan noqaqa k'a ri ruk'ayewal, ri wineq itzel xa man xtikowin ta pa ruq'a'; jak'a ri choj ruk'aslen, stape' k'o chik chuwech ri kamik, kan k'o ri akuchi nuto-ri'.

³³Kan pa ránima k'a ri wineq jebel runojibal chiri' k'o-wi ri na'oj; jak'a ri winaqi' ri xa maneq kina'oj, man ketaman ta achike ri' ri na'oj.

³⁴Ri chojmilej k'aslen kan nuben k'a chike ri winaqi' richin jun ruwach'ulew chi k'o kiq'ij; jak'a ri mak xa jun k'ixbel chike ri winaqi' richin jun ruwach'ulew.

³⁵Jun rey kan nuya' k'a rajel ruk'exel chire ri rusamajel ri ninojin jebel; jak'a chire ri rusamajel ri xa k'ixbel taq banobel yerubanala', xa ruk'ayewal nuya' chire.