Read Kaqchikel Pro 15 Bible Online

Pro 15 - Kaqchikel bible

Pro 15

¹Ri ch'uch'uj taq ch'abel kan nuben chi ri oyowal nik'is-el; jak'a ri poqon taq ch'abel xa nuben chi ri oyowal nibenimer-pe.

²Ri raq' ri chojmilej wineq, kan jebel k'a rubixik nuben chire ri etamabel; jak'a ri ruchi' ri xa maneq runa'oj, kan nuchololej ch'abel ri xa maneq rejqalen.

³Ri rutzubal ri Jehová, xabakuchi k'a napon-wi; ri runaq' taq ruwech kan ek'o k'a pa kiwi' ri utzilej y ri itzelej taq banobel.

⁴Ri utzilej taq ch'abel ri kan ye'aq'oman, e junan rik'in ri che' ri niya'on k'aslen; jak'a ri itzel taq ch'abel ri richin nikiben etzelal, nuya' pa q'axo'n ri wineq.

⁵Ri wineq ri xa maneq runa'oj nrixowaj ri rupixabanik ri rutata'; jak'a ri kan nuben ronojel ri ruchojmilal ri nibix chire, kan k'o-wi runa'oj.

⁶Pa rachoch jun wineq ri kan choj ruk'aslen, ronojel pa ruk'iyal k'o; jak'a ri nikich'ek ri winaqi' ri e itzel, xa ruk'ayewal ri nuk'en-pe chike.

⁷Ri ruchi' ri wineq ri kan k'o runa'oj, kan nutaluj k'a rubixik ri na'oj; jak'a ri winaqi' e itzel, ri nikitaluj rubixik, xa ja ri man choj ta.

⁸Ri Jehová kan nrixowaj k'a ri nisipex chire roma ri wineq itzel; jak'a ri ch'owen ri nuben ri choj ruk'aslen, kan nikikot rik'in.

⁹Kan netzelex-wi roma ri Jehová, ri rubanobal ri wineq itzel; jak'a ri winaqi' ri kan nikitzeqelibej ri chojmilej k'aslen, rija' janila yerajo'

¹⁰Kan jun poqon ch'olinik k'a niya'ox chire ri wineq ri nuya' kan ri qitzij bey; y ri kan itzel nuna' chire ri pixabanik niban chire, xtiberila-pe ri kamik.

¹¹Ri akuchi yemuq-wi ri kaminaqi' y ri akuchi ye'apon-wi chuqa', kan tik'il k'a pa ruwech ri Jehová. y más kan pa ruwech rija' ek'o-wi, ronojel ri k'o pa taq kánima konojel ri winaqi'.

¹²Ri wineq ri kan man nuch'ob ta ri yerubij, man nrajo' ta ri nipixaban richin; y kan man napon ta rik'in jun aj-na'oj, richin chi nuk'utuj ta runa'oj chire.

¹³Ri nikikot ránima ri wineq, jari' ri nibanon chire chi kan nitze'en ruwech; jak'a ri xa niq'axon ránima, jari' ri nibanon chire chi rukajman nitzu'un.

¹⁴Ri ránima ri wineq aj-na'oj, kan nukanoj k'a etamabel; jak'a ri ruchi' ri wineq ri xa maneq runa'oj, xa ja ri ch'abel ri maneq kejqalen ri nuya' kuchuq'a'.

¹⁵Ronojel q'ij richin ri ruk'aslen ri k'ayewatajineq man kan ta utz; jak'a ri wineq ri kan nikikot ránima, kan jantape' nimaq'ij chuwech.

¹⁶Kan más wi utz chi xa juba' ok ri k'o rik'in jun wineq y k'o rukiy ri Dios chuwech; y mani janila chi beyomel y xa maneq rutzil ri k'aslen.

¹⁷Más ruki'il ri ichaj, ri nitij chikikojol ri k'o ajowabel kik'in; y mani ti'ij q'en-q'en y xa nitij kik'in ri k'o oyowal chikikojol.

¹⁸Ri wineq ri kan richin wi chi niyakatej royowal, xa nuyek oyowal chikikojol ri winaqi'; jak'a ri wineq ri kan ch'uch'uj ránima, kan nuqasaj ruwi' oyowal.

¹⁹Ri bey richin ri ruk'aslen ri wineq q'or, xa nojineq chi k'ix nutzu' rija'; jak'a ri rubey ruk'aslen ri wineq choj ruk'aslen, man jun achike ta ruk'ayewal.

²⁰Jun alk'ualaxel ri kan k'o runa'oj, kan nuya' kikoten chire ri rutata'; jak'a ri alk'ualaxel ri xa maneq runa'oj, xa nrixowaj ri rute'.

²¹Chuwech ri wineq ri xa man jun retaman, ri ch'abel ri xa maneq kejqalen jari' ri kikoten; jak'a ri achin ri kan k'o retamabal, kan nuch'ob jebel ri achike ri nrajo' nuben.

²²Ri akuchi e maneq winaqi' ri yeya'on ta utzilej taq na'oj, ri samaj xa man yebanatej ta; jak'a ri akuchi ek'o winaqi' yeya'on utzilej taq na'oj, ri samaj ri e ch'obon kan yebanatej-wi.

²³Kan nikikot wi k'a ránima ri wineq toq yerubij ri utzilej taq ch'abel chike ri yek'uluben richin; kan yalan wi jebel toq kan chupan ri ramaj toq nik'atzin, jari' toq napon ri na'oj.

²⁴Ri bey ri richin ri k'aslen, kan nuben chire ri wineq aj-na'oj chi nibe pa jotol; kan nuben chuqa' chire chi tijel-el nej chire ri jul richin kamineq, ri xa pa xulan k'o-wi.

²⁵Ri Jehová kan nuwulaj ri rachoch ri wineq ri kan nim nuna-ri'; jak'a kan nuchajij jebel ri richinan kan ri malka'n-ixoq.

²⁶Ri Jehová kan yeretzelaj k'a ri itzel y ri tz'il taq ruch'obonik ri wineq itzel; jak'a ri ruch'abel ri wineq ch'ajch'oj ránima, kan e ch'ajch'oj chuwech rija'.

²⁷Kan nuk'en-wi-pe ruk'ayewal pa jay, toq jun wineq man utz ta ri akuchi nipe-wi ri ruch'akoj; jak'a ri wineq ri kan man nrajo' ta chi nipuaqix, kan kikoten xtik'ase'.

²⁸Ri ránima ri wineq ri choj ruk'aslen, kan nuch'ob na jebel ri nubij chire ri nik'uluben richin; jak'a ri pa ruchi' ri wineq itzel, kan yecholol ye'el-pe ri itzel taq ch'abel.

²⁹Ri Jehová man yeruk'ul ta ri winaqi' ri e banoy richin ri etzelal; jak'a ri ruch'owen ri wineq ri choj ruk'aslen, kan nrak'axaj k'a.

³⁰Ri kikoten nitzu'un ri runaq' taq ruwech jun wineq, kan nuk'en-pe kikoten chire jun chik; y ri utzilej taq rutzijol kan nuk'en-pe raxnaqil chire ri rubaqil ri wineq.

³¹Ri wineq ri kan nukusaj ri ruxikin, richin kan nrak'axaj ri pixabanik richin k'aslen, kan xtok aj-na'oj y kan xtik'oje' k'a ri akuchi k'o-wi ri na'oj.

³²Ri wineq ri kan man jun ruq'ij ri tijonik chuwech, kan nretzelaj-wi ri ruk'aslen; jak'a ri kan niqa' chuwech ri tijonik, nuch'ek k'a na'oj.

³³Ri rukiy ri Jehová chuwech ri wineq, kan jari' ri nik'utun ri na'oj chuwech; roma ri wineq k'o chi nuqasaj-ri' chuwech ri Dios nabey, richin nik'oje' ruq'ij.