Read Kaqchikel Pro 16 Bible Online

Pro 16 - Kaqchikel bible

Pro 16

¹Kan pa ruch'obonik wi k'a ri wineq nipe-wi ri achike nrajo' nuben; jak'a richin chi nibanatej ronojel ri', k'a ja na ri Jehová nibin wi nibanatej o ni.

²Ronojel rubeyal k'aslen, kan e ch'ajch'oj yeq'alajin chuwech ri wineq; jak'a ri Jehová nunik'oj achike roma toq ri ránima ri wineq nucha-el jun chike ri bey.

³Kan pa ruq'a' k'a ri Jehová tajacha-wi ronojel samaj ri nawajo' natikiriba'; richin chi ronojel ri ach'obon chi naben, kan yek'achoj-wi k'a.

⁴Ronojel k'a ri e ruk'iytisan ri Jehová, kan k'o k'a achike roma e rubanon kan; kan jajun ri wineq itzel, ruya'on q'ij chi k'o, richin ri q'ij ri richin ri ruk'ayewal.

⁵Konojel ri winaqi' ri nikinimirisaj-ki', kan itzel yerutz'et ri Jehová; y kan qitzij wi chi man xkek'oje' ta kan choj keri', xa kan xtikik'ul rutojbalil.

⁶Ri wineq ri kan qitzij nutzeqelibej ri Dios y man numalij ta kan, kan xtikuyutej rumak, y wi kan xtunimaj rutzij ri Dios, man jun itzel xtuk'uluwachij.

⁷Toq ri rubanobal ri wineq kan niqa' chuwech ri Jehová, kan e jajun chuqa' ri winaqi' ri ye'etzelan richin, nisiliso-qa ri koyowal chirij.

⁸Más utz xa juba' ok ri nik'oje' pa ruq'a' ri wineq y rik'in ruchojmilal ruch'akon-wi; y mani beneq pa jotol rik'in ronojel ri nuch'ek, y xa nutz'oq chuwi-kiq'a' ri winaqi'.

⁹Ri runojibal ri wineq kan nisamej-wi chuch'obik ri rubeyal ri k'aslen, jak'a ri ruxaka'l ri xtuya', k'a ja na ri Jehová xtik'utu chuwech akuchi nuk'uaj-wi

¹⁰Ri ch'abel ri nubij ri rey, kan e pixa' ri kan k'o chi yebanatej; kan ja ri ch'abel ri nik'atzin chi nubij, kan jari' ri yerukusaj toq niq'aton-tzij.

¹¹Ri q'atbel-tzij richin ri Jehová kan tz'aqet-tz'aqet, kan achi'el ri pajbel y ri etabel, kan ja rija' k'a ri xtz'ukun-pe ri tz'aqet pajbel y ri tz'aqet etabel.

¹²Kan man ruk'amon ta chire jun rey chi yerubanala' itzel taq banobel; roma kan richin chi k'o ruchojmilal toq k'o ri rey ri chiri' pa rutz'uyubal.

¹³Kan nuya' wi k'a kikoten pa kánima ri achi'a' e rey, toq pa ruchojmilal yech'on ri winaqi'; y ri kan ruyon qitzij ri nubij kan najowex-wi koma rije'.

¹⁴Toq kan royowal ri rey, jari' ri nibin chi kan k'o-wi ri xtuteq pa kamik ri q'ij ri'; jak'a ri wineq ri kan k'o runa'oj, nitikir nuben chi niqaqa ruwi' ri royowal ri rey.

¹⁵Toq ri rey kan nikikot y nitze'en ruwech, kan man jun k'a xtrelesaj ruk'aslen; y ri utzil ri xtuya' pa kiwi' ri winaqi', kan xtiqaqa k'a achi'el nuben ri job toq pa ruq'ijul niqaqa.

¹⁶Kan más k'a utz chi ri wineq nril na'oj, ke chuwech nril q'anapueq; y xa más utz chuqa' toq k'o utzilej ch'obonik rik'in, ke chuwech ri k'o ta saqipueq rik'in.

¹⁷Ri rubeyal ri ruk'aslen ri chojmilej wineq, kan nuch'er-ri' chire ri rubeyal ri itzel k'aslen; ri kan nuchajij k'a ri ruk'aslen, kan nutzu' k'a jebel ri bey ri nuk'uaj.

¹⁸Nabey ja ri nimirisanen ri nipe pa ruk'aslen ri wineq, y k'ari' nuben chire chi nibe pa xulan; kan roma k'a ri nunimirisaj-ri', roma ri' toq ri ruk'aslen ri wineq nitzaq.

¹⁹Kan más k'a rejqalen chi nuqasaj-ri' ri wineq y junan rubanik kik'in ri man jun k'o kik'in; ke chuwech nril-apo janila chi méro kik'in ri winaqi' ri xa kimajon-pe chuwi-kiq'a' ch'aqa' chik winaqi'.

²⁰Ri wineq ri kan nuch'ob rij jebel ri achike ri nuben, kan nibe-wi pa jotol; jak'a ri wineq ri kan nroyobej ruto'onik ri Jehová, kan nril-wi urtisanik.

²¹Ri winaqi' kan niketamaj k'a ruwech ri kan aj-na'oj-wi, roma kan nuch'ob na jebel ri achike nuben; y ri ruki'il ri ch'abel ri ye'el pa ruchi', kan yeruch'ek más winaqi'.

²²Ri na'oj, kan ja wi ri' ri niya'on ruk'aslen ri wineq ri aj-na'oj; jak'a wi natejtobej natijoj jun ri xa maneq runa'oj, xa man jun rejqalen.

²³Ri ránima ri wineq aj-na'oj, kan nuben chire chi rik'in etamabel nich'on; y jari' chuqa' nibanon chire chi ri rutzil ri ruch'abel, kan q'ij-q'ij más utz.

²⁴Roma ri' ri ruki'il ri ruch'abel, kan junan ruki'il rik'in ri kab ri nikiya' ri taq chikopi'; kan nuya' ruki'il ri k'aslen y nuya' raxnaqil chire ri ch'akulaj.

²⁵Kan k'o-wi k'a bey ri choj niq'alajin chuwech ri wineq; jak'a ri pa ruk'isibel nibeq'alajin-pe chi xa bey richin kamik.

²⁶Ri wayjal jari' ri nibanon chire ri wineq chi k'o chi nisamej kow; roma ri wineq kan nrajo' k'a chi k'o ri nutej toq ninum-pe.

²⁷Ri nowineq chubanik etzelal, nich'oboch'ot k'a richin achike etzelal niberubana'; y ri tzij ri nuben kan niporon achi'el ruxaq-q'aq'.

²⁸Ri wineq ri nukusan y nelesan tzij, xa nutik k'a oyowal; y ri kamuluy-tzij kan nitikir yeruch'er ri kan kachibil-ki'

²⁹Jun wineq ri ruyon itzel yerubanala', yeruq'ol ri rachpochel; kan nuben chike chi nikichop-el jun bey man utz ta.

³⁰Ri wineq ri nuben retal rik'in ri runaq'-ruwech chire ri rachibil, xa achike na chi etzelal ri nrajo' nuben, y keri' chuqa' ri yerubanala' retal rik'in ri ruchi'.

³¹Ri corona ri más rejqalen, ja ri nisaqir-pe ri rusumal-ruwi' jun wineq toq nukochij k'iy rujuna'; jare' k'a ri nuch'ek roma ri chojmilej k'aslen ri xuk'uaj.

³²Kan janila k'a rejqalen chi ri wineq nuq'et-ri' chire ri royowal, ke chuwech nuk'ut chi man nuxibij ta ri'; y chuqa' kan más jebel nich'akon chirij ri royowal, ke chuwech ri nuch'ek ta jun tinamit.

³³Ri wineq xaxe k'a nuk'eq-apo ruwech chirij ri nurayij, xa achi'el rubanik jun sakinik; y ja ri Jehová ri xtibin wi nuya' o man nuya' ta ri nurayij.