Read Kaqchikel Pro 17 Bible Online

Pro 17 - Kaqchikel bible

Pro 17

¹Xa más jebel chi ri wineq xa chaqwey ri nutej, xaxe wi rik'in kikoten; ke chuwech ek'o jebelej taq rukil y xaxe oyowal pa jay.

²Ri samajel aj-na'oj, jari' xtiyuqen richin ri ruk'ajol ri rajaw, wi man choj ta nich'obon ri ala'; y roma ri' re samajel re' xtichinan junan kik'in ri alk'ualaxela'.

³Richin chi nitz'et wi utz ri saqipueq, niya'erisex pa jun bojo'y y ri q'anapueq niya'ox pan horno; jak'a richin nitz'et wi ch'ajch'oj ránima ri wineq, kan ja ri Jehová ri nitejtoben.

⁴Ri winaqi' ri kan e itzel, kan nikiya' kixikin chike ri kan e itzel chuqa'; y ri winaqi' ri kan e tz'ukuy-tzij, kan yeniman chuqa' chike ri e tz'ukuy-tzij.

⁵Ri xa nutze'ej ri wineq ri man jun k'o rik'in, xa chirij k'a ri xk'iytisan richin nitze'en-wi; roma ri xa nitze'en chirij ri ruk'ayewal, xa kan xtapon k'a chupan ri ruk'ayewal ri'.

⁶Ri ruwaq'ijaj kichin ri winaqi' ri kan k'o chik kijuna', jari' e kiy-kimam; y ri ruwaq'ijaj kichin ri alk'ualaxela' kan ja ri kite-kitata'.

⁷Man jun wineq ri kan yerukanola' ta jebel taq ch'abel, richin nich'on rik'in ri xa maneq runa'oj; y kan keri' chuqa' man ruk'amon ta chi niban-apo ch'owen chire jun tata'al rik'in tz'ukun taq tzij.

⁸Ek'o winaqi' nikinimaj chi ri yepuaqin kan achi'el jun ti abej ri tzeqel chikiqul richin yeruto' chupan ri kik'aslen; y nikich'ob chi xabakuchi yebe-wi kan yeruto' richin nikiben ri achike nikajo'.

⁹Jun ri kan nukuy rumak ri jun chik, kan q'alaj chi nukanoj jun qitzij rachibil; jak'a ri xa nuchop rutzijoxik ri etzelal ri xban chire, ri rachibil xa xtibe.

¹⁰Jun wineq ri kan k'o retamabal, xaxe rik'in nich'olix jun bey nretamaj; jak'a ri wineq ri xa maneq runa'oj, stape' janila k'iy mul nich'ay man nretamaj ta.

¹¹Jun wineq ri kan nupaba-ri' richin man nuben ta ri nibix chire, xa etzelal ri nroyoj chirij; y roma ri' richin chi nretamaj ri rutzijol ri niya'ox chire, xa jun itzel achin ri nitaq-pe rik'in

¹²Más utz juba' nabek'ulu-pe jun ixoq oso, ri yakatajineq royowal roma ri e elesan-el ri taq ral chuwech; ke chuwech nabek'ulu-pe jun wineq ri xa maneq runa'oj, y xa ch'abel ri ch'obon man ch'obon yerubila'.

¹³Ri wineq ri xa itzel ruk'exel nutzolij chire ri jun chik wineq ri k'o utz ri nuben chire; ri pa rachoch ri nibanon itzel, kan man jun bey xke'uxlan ta juba' pa ruq'a' ri etzelal.

¹⁴Kan achi'el jun raqen-ya' ri nijaqatej-el, keri' ri oyowal ri nitz'ukutej-el; más utz yatanimej-el chuwech ri oyowal ri' y mani naju-awi' chupan.

¹⁵Ek'o yebanon chi ri aj-mak choj rubanobal nikiben chire y ri maneq rumak nikiben aj-mak chire; chi ka'i' banobel re' kan itzel k'a nitz'et roma ri Jehová.

¹⁶¿Kan k'o kami nik'atzin-wi ri méro ri napon pa ruq'a' jun wineq ri xa maneq runa'oj? ¿Kan nukusaj kami ri méro ri' richin nuloq' retamabal, stape' maneq runa'oj?

¹⁷Ri wineq ri kan qitzij achibil, kan nrajo-wi ri rachibil stape' k'o pa rutzil o ruk'ayewal; jun ach'alalri'il xalex chuwech re ruwach'ulew richin chi nuto' ri rach'alal toq napon pa ruk'ayewal.

¹⁸Xaxe jun achin ri man nich'obon ta jebel, ri nusuj-ri' richin nuto' xabachike wineq; y kan nupaba-ri' chuwech jun k'as ri nuben jun rachibil rik'in jun chik wineq.

¹⁹Ri wineq ri niqa' chuwech yerubila' ch'abel chikij ri winaqi', xa oyowal nukanoj; ri xa ruyon nunimirisaj-ri' xa kan ruyon rija' ri nukanoj ri wululen pa ruwi'.

²⁰Ri wineq ri kan ruyon itzel taq ch'obonik ek'o pa ránima, kan man kikoten ta xtik'oje'; y ri wineq ri k'o jun raq' ri kan xaxe richin yerubila' ch'abel ri man e ruk'amon ta, k'ayew ri xkeruk'uluwachila'.

²¹Ri wineq ri nalk'ualan jun ak'ual ri xa maneq runa'oj, kan junan rik'in nralk'ualaj ta ri q'axo'n; man jun tata'aj ri nikikot ta roma k'o jun ralk'ual ri xa man nrajo' ta chi nitijox.

²²Chire ri wineq nuk'en-pe raxnaqil, toq ri ránima kan nikikot; jak'a ri wineq ri xa nibison ránima, xa jari' ri nikamisan-el richin.

²³Ri itzel q'atoy-tzij, kan yeruk'ul kan ri sipanik ri nikiya' kan ri winaqi' pa ruq'a'; y xa roma ri' toq rija' nujel rubanik ri ruq'atbal-tzij.

²⁴Ri wineq ri kan k'o retamabal man nisach ta ruk'u'x chupan ronojel ri nuben; jak'a ri maneq runa'oj xa nisach chupan ronojel.

²⁵Ri niya'on q'axo'n pa ránima jun tata'aj, ja ri alk'ualaxel ri man nunimaj ta tzij; y re' nuk'en chuqa' pe jun k'ayilej-k'aslen chire ri te'ej.

²⁶Kan itzel wi k'a chi yebilox itzel ch'abel chike ri kan choj ri kik'aslen; y kan man utz ta chuqa' chi yech'ay ri k'o kiq'ij y kan tz'aqet ri kik'aslen.

²⁷Ri wineq ri man jantape' ta niwolol, retaman jampe' toq utz nich'on y jampe' toq man utz ta nich'on; roma ri wineq ri ch'uch'uj ránima, xa kan xaxe ri ch'abel ri nik'atzin jari' ri nubij.

²⁸Kan jajun ri wineq ri maneq runa'oj, niq'alajin chi aj-na'oj, xaxe rik'in ri man niwolol ta q'anej; y ri wineq ri nutz'apej ruchi' richin man yerubij ch'abel ri bilon man bilon, kan niq'alajin chi k'o retamabal.